Në skuadrën olimpike shqiptare po vazhdojnë përplasjet. Pas deklaratës së presidentit të KOKSH, Viron Bezhani, për Top Channel, ka folur edhe peshëngritësi Calja, i cili përsërit edhe njëherë ultimatumin e tij se mund të braktisë garën në rast se Bezhani nuk i kërkon falje publike.
“Nuk e marr vesh, a është Vironi i parë apo i dyti, ky që po flet për Top Channel? Një njeri i tillë duhet të ketë edhe përgjegjësi, sepse është president i Komitetit Olimpik Kombëtar Shqiptar. Nëse unë jam fajtor, unë tërhiqem nga sot, e them publikisht përsëri. Unë nuk jam zari i askujt, jam sportist i ekipit kombëtar dhe nuk pyes askënd”, ka thënë Briken Calja.
I pyetur nga gazetari Sokol Balla se a do ta braktisë garën ku ai sipas testeve paraprake gjendet në zonën e medaljeve, Calja u shpreh: “Kështu siç po shkojnë gjërat, duke parë edhe përgjigjen e presidentit të Komitetit Olimpik Kombëtar Shqiptar... Këtu kam ardhur për të përfaqësuar Shqipërinë, por kur vete puna deri në këtë pikë, dua vetëm që Viron Bezhani të kërkojë ndjesë publikisht."
Lexo gjithashtu
