Rinovimi i Arinaldo Rrapajt deri në vitin 2026 padyshim ishte lajm i bukur për klubin e Partizanit. Mesfushori vlonjat zgjodhi të zgjaste bashkëpunimin edhe për 3 vite të tjera me kampionët e Shqipërisë. 21-vjeçari shkëlqeu në sezonin që lamë pas me kryeqytetasit dhe tashmë pritet të shpërthejë për të arritur të transferohet në një kampionat më të fortë.
Mesfushori ishte gjetje e Ilir Dajës që te Flamurtari. Trajneri kryeqytetas e mori me vete te Skënderbeu dhe më vonë te Partizani. Pikërisht tek të kuqtë, Rrapaj tregoi se do të ishte pikë kyçe. Dhe në fakt kështu ndodhi. Interesimi për shërbimet e tij nuk ka munguar. Të gjendur në këto kushte, drejtuesit i zgjatën kontratën.
Sot, klubi i kuq ka bërë një postim në kanalet zyrtare të komunikimit ku tregon gola të shënuar pikërisht nga Rrapaj. Duket si një lloj krenarie për mënyrën se si ai nuk u mendua dy herë, por rinovoi me propozimin e parë të drejtuesve të Partizanit. Tashmë pritet të shihet se si do të jetë ecuria e tij në Champions League, kompeticion në të cilin marrin pjesë të kuqtë.
Lexo gjithashtu
