Tekniku i Kombëtares Angleze Roy Hodgson është shprehur shumë i lumtur për fitoren e skuadrës së tij në minutat e fundit ndaj Uellsit .
”Mendoj se është e rrallë të shohësh dy ndeshje radhazi që vendosen në shtesë”, ishin fjalët e para të teknikut anglez, i cili nuk kurseu as ironinë për Bale dhe deklarimet e tij në media duke thënë se anglezët nuk do të jenë aq krenarë sa Uellsianët për Kombëtaren e tyre.
“Nëse do ta kisha parë këtë ndeshje nga larg dhe nuk do ishte Anglia ajo që do të luante kundër Uellsit, por një skuadër tjetër, do të më kishte ardhur shumë keq për humbjen e tyre.Por ata duhet të më falin që nuk më vjen keq, sepse unë dua të jem i gëzuar për fitoren e skuadrës time”, shprehet Hodgson.
Skuadra e Anglisë e ka hedhur pas krahëve ndeshjen me Rusinë në të cilën pësuan golin e barazimit në momentet e fundit dhe feston këtë fitore të shumëpritur me ”armikët ishullorë” të Uellsit.
