Kukësi do të ndeshet këtë javë në turin e tretë kualifikues të Europa League me ekipin gjeorgjian të Torpedo Kutaisi. Pas zhgënjimit kundër Qarabag në Champions, për verilindorët tashmë të gjitha forcat do të përqëndrohen në këtë takim, pasi një eleminim tjetër do të konsiderohej si një dështim nga presidenca dhe drejtuesit e skuadrës.
Megjithatë përballja me kampionët e Gjeorgjisë pritet të jetë mjaft e vështirë. Kampionati në vendin kaukaz zhvillohet sipas viti kalendarik, që do të thotë që atje tashmë ekipet kanë zhvilluar gjysmën e sezonit. Kjo bën që kundërshtari i Kukësit të vij në formën më optimale të mundshme përsa i përket gjendjes fizike në këtë përballje.
Megjithatë nga ana sportive Torpedo po zhgënjen këtë edicion në Gjeorgji. Kampionët në fuqi në 18 javë kampionat kanë grumbulluar vetëm 27 pikë, duke u pozicionuar kështu në vendin 5-të, plot 19 pikë nga vendi i parë që mbahet nga Saburtalo. Pra prakikisht Torpedo e ka dorëzuar që tani titullin kampion për këtë vit.
Nga ana tjetër ashtu si verilindorët, edhe gjeorgjianët do ta luajnë ndeshjen e shtëpisë jo në stadiumin e qytetit të tyre (Kutaisi) por në kryeqytetin Tbilisi. Kjo natyrisht pritet të jetë pozitive për Kukësin duke e vendosur në pozita të barabarta përsa i përket tifozerisë. Përpos kësaj e përbashkëta tjetër është se të dy ekipet vijnë nga Champions, me Torpedon që u eleminua në turin e parë nga Sheriff, kundërshtari i Kukësit vitin e shkuar.
Le të shpresojmë në një paraqitje sa më të mirë të skuadrës së drejtuar nga Armando Cungu, pasi kundërshtari është plotësisht i kalueshëm. Ndeshja e parë do të luhet të enjten e 9 gushtit në Gjeorgji, ndërsa kthimi një javë më vonë në "Elbasan Arena".
Lexo gjithashtu
