Tirana e këtij sezoni është ndërtuar për të fituar gjithçka. E tillë u ndërtua edhe ekipi i vjetshëm por pjesët filluan duke rënë rrugës me largime të shumta e dëmtime që e lanë trajnerin Shehi me një grup të reduktuar lojtarësh. Megjithatë, tekniku durrsak arriti t’u merrte maksimumin pjesës së mbetur duke i dërguar vetëm 90 minuta larg titullit kampion dhe deri në finalen e Kupës.
Fatkeqsisht për ta, nuk u fitua asnjë trofe, por kjo i dha një mësim drejtuesve. Tashmë në merkaton e verës kemi parë një Tiranë bindëse me lojtarët e rinj të afruar që janë të nivelit të lartë për Superioren, të gjithë prej tyre në fakt kanë fituar trofe në futbollin shqiptar veç Kaina Nunes që do të provojë ta bëjë këtë sezon.
Titulli është objektivi i vetëm, jo thjesht për prestigjin por mbi të gjitha për përfitimet monetare që siguron. Janë plot 1.5 milionë euro që Tirana do t’i ketë në xhep nëse ia del të shpallet kampion për herë të 27-të.
100 milionë nga FSHF, 150 milionë lekë nga Bashkia Tiranë, 150 mijë euro nga e drejta TV. Një shumë e majme prej mbi 300 mijë eurosh që vjen thuajse çdo sezon nga biletat e shitura dhe plot 820 mijë euro të siguruara nga pjesëmarrja në Europë edhe sikur të humbase çdo ndeshje shkon në shumën e majme prej 1.5 milionë eurosh.
Një shumë që do të përfitohet nga çdo ekip kampion, por te Tirana është e detyrueshme për të justifikuar prestigjin, historinë dhe mbi të gjitha kostot e shpenzuara për ndërtimin e këtij ekipi.
Lexo gjithashtu
