Sot, Elbasani luajti kundër Dinamos, ndeshje që përfundoi në barazim 1-1. Ky takim u zhvillua në stadiumin "Nexhip Trungu" në Cërrik, ku të pranishëm për të mbështetur ekipin verdhezi ishin ultrasit e Elbasanit të njohur si tifo-grupi "Tigrat".
Përpos mbështetjes në fushën e blertë për skuadrën e tyre, Tigrat kanë gjetur kohë të tallen në grup edhe me gjyqtarin anësor, Gëzim Koka nga kolegjiumi i Lezhës. Në një video komike të siguruar nga newsport.al shihen se si tifozët verdhezi imitojnë Kokën.
Anësori lëviz në fushë, këta lëvizin në turmë në kahun e gjyqtarit në shkallët e stadiumit. Ai ngre flamurin, këta ngrejnë dorën. E çuditshme, por e vërtetë. Në kampionatin shqiptar është e mundur të ndodhë gjithçka.
Kujtojmë që pas këtij barazimi Dinamo ka siguruar matematikisht mbijetesën në Kategorinë e Parë, teksa është ngjitur në kuotën e 19 pikëve. Ndërsa fati i Elbasanit do të përcaktohet përfundimisht javën e ardhshme, ku do të përballet me Sopotin. Një barazim ose fitore do t'i mbante verdhezinjtë në Kategorinë e Parë, ndërsa humbja i zbret një kategori më poshtë.
Shihni videon komike:
https://www.youtube.com/watch?v=zbUPQ1PdHFA&feature=youtu.be
Lexo gjithashtu
