Problemet e Skënderbeut me UEFA-n duket se janë në fazën më të nxehtë. Pas periudhës kur skuadra korçare akuzohej për ndeshje të trukuara, tashmë klubi korçar kërkon të zbardhet e vërteta dhe hedh dyshime për njerëzit që kanë hapur këtë skandal.
Në një deklaratë të bërë në "facebook", ku kanë ilustruar edhe me video një ndeshje të dyshuar si të trukuar, bardhekuqtë shprehen në një deklaratë të gjatë se ndeshjet e tyre nuk janë analizuar nga ekspertë të kësaj fushe.
"Këtu fillon gjurmimi i UEFA-s për ekipin e Skënderbeut. Kjo është ndeshja e parë e cilësuar si e dyshuar nga organet e UEFA-s. Kjo sfidë është e ngulitur thellë në memorien e çdo tifozi korçar dhe jo vetëm, si një ndeshje dramatike! 11 - metërsh i humbur nga Brkiç dhe një 11-metërsh i pritur nga Orges Shehi në minutën e 90+5 të takimit!
Çdokush mund ta shikojë dhe gjykojë këtë ndeshje dramatike! Etiketimi i kësaj ndeshje si e dyshuar për trukim, tregon qartë tendencën e inspektorit të Uefa-s për ta dëmtuar skuadrën e Skënderbeut!
Ne si klub, kemi një kërkesë për "SuperSport", që këto gjashtë ndeshje, që i përkasin kampionatit Shqiptar të cilat cilësohen si më të dyshuarat nga organet e UEFA-s të ritransmetohen edhe një herë në TV për të rikthyer në memorien e çdo tifozi korçar dhe jo vetëm e për të sqaruar edhe opinionin publik se kush janë cilësuar ndeshje të dyshuara si të trukuara!
Skënderbeu - Shkumbini 1-0
Kastrioti - Skënderbeu 0-0
Dinamos - Skënderbeu 1-3
Skënderbeu - Laçi 0-0
Skënderbeu - Teuta 2-2
Skënderbeu - Tërbuni 4-0
Çudia e madhe është se gjykimi i këtyre ndeshjeve nuk është bërë nga specialistë të futbollit apo inspektorë të mirëfilltë të futbollit pranë UEFA-s.
Jemi shumë të qetë në punën tonë dhe jemi të sigurt që me punën që po bëjnë të gjitha hallkat e klubit, do të vazhdojmë të kryesojmë kampionatin dhe të pretendojmë për titullin e radhës kampion, si i vetmi synim i Skënderbeut!", përfundon deklarata e Skënderbeut.
Lexo gjithashtu
