Federata Shqiptare e Futbollit ka zhvilluar një konferencë të jashtëzakonshme në lidhje me akuzat për zhdukjen e fondeve të FIFA dhe zgjedhjet në Shoqatat Rajonale.
Përpara gazetarëve foli drejtori juridik në FSHF, Aldi Topçiu, që tregoi se janë njoftuar FIFA dhe UEFA për presionet politike. Në komunikim, Topçiu solli shembullin se në zgjedhjet e Shoqatës Rajonale të Elbasanit, ka pasur sulm fizik dhe psikologjik.
Pjesë nga fjala e Topçiut.
"Po e nis nga eksperienca e djeshme. Pata kënaqësinë të merrja pjesë në punimet e Asamblesë së
Përgjithshme të Shoqatës Rajonale të Futbollit Elbasan. Pata edhe fatin e keq të isha dëshmitar i një
sulmi fizik dhe psikologjik në të cilin anëtarët e Shoqatës iu nënshtruan para, gjatë dhe pas mbledhjes.
Ata ishin thirrur në zyrën e kryetarit të Bashkisë, të gjithë ata që punonin në arsim, duke u kërcënuar
se nëse nuk merrnin vendime sipas udhëzimeve, do të vuanin pasoja me largim nga puna. Ata vetë
dhe të afërmit e tyre.
U ishte dhënë edhe një fletushkë me instruksione se pse ata nuk duhet të vendosnin dje lidhur me
përfaqësuesit e tyre në Asamblenë e Përgjithshme të FSHF. Edhe pse nën presion, ata u
ndërgjegjësuan që kur ke përballë dy njerëz: ku njëri të kërcënon dhe tjetri të shtrin dorën për
bashkëpunim, gjithmonë i duhet dhënë dora të dytin.
Me kurajo dhe shumë guxim, ata vendosën t’i zgjidhnin delegatët që do t’i përfaqësonin. Kujtdo që i ka
vajtur mendja për ta uzurpuar apo çliruar futbollin, varet si e sheh, mesa duket i mungojnë numrat për
ta arritur këtë qëllim.
Në mungesë të numrave kanë zgjedhur të bëjnë veprime të dëshpëruara juridike. Edhe ata që kanë
votuar pro janë detyruar të paraqiten përpara një noteri në Elbasan, duke ndryshuar në një farë
mënyrë vullnetin e tyre.
Do doja t’u azhornoja pak mbi ‘llumin e Shijakut’, i cili krijohet nga lumi Erzen. Pas 15 vjet shkresash,
anëtari ynë i klubit të Erzenit, vendosi ta plotësojë kriterin ligjor të licencimit, duke formalizuar disa vite
më parë formën e vet ligjore, duke u organizuar në formën e një Shoqate, e themeluar nga pesë
anëtarë, dy nga të cilët ishin përfaqësues të Bashkisë së këtij qyteti.
Klubi i Erzenit është anëtar i Shoqatës Rajonale të Futbollit Durrës, që i zhvilloi punimet ditën e hënë.
Në përfundim, ata morën vendimet e tyre në përputhje me statusin.
Bashkia e këtij qyteti, përmes kryetarit, ka marrë përsipër të prodhojë një dokument me anë të të cilit
autorizon një drejtor shumësportësh në këtë Bashki, që të përfaqësojë Bashkinë Shijak, jo vetëm në
punimet e Asamblesë së FSHF, por në punimet e gjitha Shoqatave Rajonale të FSHF.
Nga nxitimi e përgatisin shkresën përpara se të vinte njoftimi, pra kemi një situatë juridike absurde.
Është prodhuar një dokument nga një entitet që nuk është anëtar i FSHF apo i Shoqatës Rajonale
Durrës. Nuk e lejon ligji, me zhvillimet e fundit, bashkitë janë të detyruara t’i shesin edhe ato aksione
që kanë. Është veprim tejet banal nga pikëpamja ligjore, pasi Bashkia ka marrë atribute që nuk i ka,
duke prodhuar akte për një organ në të cilin nuk është anëtar.
Ky veprim është në vrazhdën e presioneve politike ndaj anëtarëve tanë. Presioni është më i qartë dhe
më i pastër në Tiranë. Anëtarët e Shoqatës Rajonale Tiranë, thirren nëpër zyrat e shtetit dhe Bashkisë
ku u bëhet presion dhe be rrufe se nëse nuk mbështesin kandidatin e tyre të preferuar do të largohen
nga puna”, tha mes të tjerash Topçiu.
Lexo gjithashtu
