Nga Retin TOKA
E hënë. Mimozat qëndronin stoike poshtë hotelit ku skuadra e Partizanit qëndronte e grumbulluar. Ngjyra e tyre dukej se shkonte me gjendjen shpirtërore të trajnerit Giovanni Colella. Italiani ishte në qendër të vëmendjes. Në fakt kështu kishte qenë qysh në krye të herës kur zgjodhi të drejtonte një nga ekipet më me histori në futbollin shqiptar.
Në orën 19:00, Partizani i tij do të përballej me Tiranën. Një sfidë, emocionet e së cilës i kishte provuar dy herë. Në të parën i ishin përcjellë ato negativet, ndërsa në të dytën emocionet e fitores. Ndryshe nga ditët e tjera, ishte fjalëpak dhe për t’i dhënë drejtim gjendjes së tij shpirtërore, vendosi të bënte një xhiro për qark stadiumit “Air Albania”.
Kishte dyshime për titullarët që do të hidhte në fushë. Ishte i bindur se kjo sfidë do të fitohej vetëm nga trajnerët. Nuk e kishte thënë në asnjë moment, por në subkoshiencën e tij, sfidat me episode mund të fitohen vetëm nga merita e drejtuesit. Me pasaportë është italian, por në fushë i pëlqen të sillet shpesh si brazilian.
Pak para ndeshjes , i komunikoi lojtarëve se kush do të ishte në fushë dhe cili jo. Befasia mbante vetëm një emër që quhej Giovani Colella. Italiani bëri bast me veten dhe zgjodhi Maguette para Hotit dhe Mba-në e janarit para Tedi Carës të 2020-tës (Vit kur kavajasi u transferua tek të kuqtë). Dy titullarë absolutë duhej ta nisnin këtë takim nga pankina.
“Mjeshtrat” e studiove u habitën nga zgjedhja e italianit. Colella ishte i qetë. Kishte marrë masat për çdo lëvizje të kundërshtarit. Iu përgjigj Shehit me të njëjtën monedhë. Për herë të parë, në krahun e majtë të mbrojtjes, Partizani kishte një lojtar si Maguette. Sërish analiza prej larg ishte e rrufeshme. “Ai është i ngadaltë, Deliu do t’i hapë punë”, u tha në mikrofon gjatë komentit.
Jo vetëm që nuk i krijoi probleme, por afrikani e kishte linjën e majtë si një bulevard ku mund të bënte xhiron e darkës. Nuk lejoi në asnjë moment futbollistët e Tiranës të depërtonin. Colella veproi drejtë. Krijoi një formacion, befasues nga emrat, por efikas në fushën e blertë.
Arriti të fitonte një ndeshje ku presioni peshonte nga ana e “demave”. Bëri të pabesueshmen me më të vështirën. Tregoi mjeshtërinë e shkollës italiane, të cilën s’preferonte ta aplikonte në karrierën e tij. Por, ndoshta ky derbi e donte. Jo vetëm për të fituar, por edhe për t’i mbyllur gojën të gjithë skeptikëve.
2 gola, penallti e humbur dhe një tranversë fatkeqe ishin shumë për një përballje derbi. Colella dha leksione për të gjithë trajnerët e papunë shqiptarë dhe jo vetëm. U tregoi dhe analistëve, që në komoditetin e kolltukut të studiove mund të peshohet ndoshta drejtë, por asesi të fitohet përmes fjalëve.
U doli jashtë parashikimeve dhe kritikëve më të zjarrtë që kanë një emër ekskluziv për zëvendësuesin e tij. Ai dje mund të ishte në shtëpi. Me ndeshjen në Shkodër tregoi se është burrë dhe merr përsipër përgjegjësinë e dështimit. Por, në të njëjtën kohë po dje theksoi se ka kualitetin e duhur për të drejtuar Partizanin.
Ky është Giovanni Colella, italiani i të kuqve, “demi” që me hir apo pa hir tashmë ka hapur shumë dyer në realitetin e futbollit shqiptar.
Lexo gjithashtu
