Të enjten do të luhet derbi i shumëpritur mes Partizanit dhe Tiranës, ndeshje e vlefshme për javën e 15-të të Superiores. Një takim që veç rezultatit, luhet për prestigj. Të kuqtë vijnë në këtë sfidë pas fitores 2-1 kundër Skënderbeut në transfertë, ndërsa bardheblutë pas triumfit me përmbysje 2-1 ndaj Kastriotit në shtëpi.
Në një ndeshje derbi, nuk mund të ketë kurrë favoritë. Megjithatë newsport.al ka analizuar takimin dhe ka radhitur 10 arsye se pse Tirana mund të dalë me 3 pikë nga ndeshja e së enjtes që do të zhvillohet në orën 18:00, në “Elbasan Arena”.
10 ARSYET PSE TIRANA FITON KUNDËR PARTIZANIT
– Rezultatet pozitive në ndeshjet e fundit derbi kanë qetësuar bardheblutë dhe tanimë futen në fushë pa presion.
– Kanë në skuadër një lojtar si Batha që e njeh mirë ambientin e kuq dhe di si t’i shënojë asaj skuadre.
– Trajneri Nevil Dede, dikur ish futbollist ka fituar shumë derbi dhe para një sfide të tillë di si ta karikojë në maksimum skuadrën.
– Terreni është favorizues për manovrën sulmuese të Ernest Muçit që në dyluftimet një për një del gjithmonë fitimtar.
– Një fitore duhet për të qëndruar brenda objektivit të caktuar në fillim të sezonit. Në të kundërt Vllaznia kryesuese shkëputet plot 15 pikë.
– Në skuadër është afruar Taulant Seferi, sulmuesi cilësor i Kombëtares që pritet ta nisë si titullar.
– Ndeshja e dytë derbi në sezonin e shkuar përmbysi situatën negative te Tirana duke i dhënë një shtysë të fortë drejt titullit kampion.
– Presidenti Halili ka gati “asi nën mëngë”, premion vetëm që derbi të fitohet.
– Partizani ka më shumë fitore në përballje direkte dhe një triumf i mundshëm i Tiranës, do të rehabilitonte disi statistikat mes dy ekipeve.
– Katërkëndëshi bardheblu me Visar Bekajn në portë është kyçur, duke pësuar vetëm 9 gola, aq sa dhe Partizani. “Gardiani” kosovar, një siguri më vete për kampionët. /Newsport.al/