Transferimi i Xhuliano Skukës padyshim ishte lajmi kryesor në çdo media në vendin tonë. Plot 1.4 milionë euro për klubin e Partizanit që mbush në këtë mënyrë ndjeshëm arkën. Olsi Rama është “arkitekti” në hije i kësaj skuadre.
Këtë vit, ai ka qenë larg mediave, por pranë skuadrës. Transferimi i Skukës padyshim është shpërblimi i punës së bërë jo veç nga lojtari, por edhe nga drejtuesit. Në një intervistë të dhënë për Supersport, Rama ka treguar gjithë kalvarin e gjatë për shitjen e këtij futbollisti.
Kalimi te Partizani - Kërkesa ime për Skukën ka nisur para dy vitesh. Mund të kem bërë katër takime me menaxherin e tij, Elton Marini. Kur morëm Skukën, pashë tek ai disa veti dhe cilësi të mira që mund t’i shërbenin Partizanit. Nuk e parashikoja që ecuria e tij të ishte e tillë, që ai të shënonte më shumë se 20 gola në një vit kalendarit. Është si ajo situata kur shpreson më të mirën dhe përgatitesh për më të keqen, por e ndieja se kisha marrë një lojtar që do të kontribuonte, por jo tek niveli që ai arriti. Skuka ishte një bast i humbur për Dinamon, por unë e kisha parë në pjesën më të madhe të ndeshjeve dhe dalloja shkëndijat që tregonte vlerat në fushë.
Ofertat - Ka pasur interes nga disa ekipe konkrete, nga disa menaxherë. Ka pasur interes edhe për tani, në janar, edhe për në verë. Bisedimet kanë nisur që para disa muajsh, me ekipe konkrete, por ishte edhe intuita e presidentit Demi me çfarë ai shikonte se ishte vlera e Skukës, sigurisht edhe insistimi i Shkumbin Qormemetit, që sollën oferta konkrete e që na çuan te një transferim i tillë efikas. Skuka është ai lojtar që në ato pak muaj te Dinamo nuk bëri gjë, por te Partizani gjeti ekipin ku mund të shprehej dhe arriti që të bënte golat që bëri dhe ne shpresojmë të gjemë një zëvendësues të denjë.
Aventura te Partizani - Kur Skuka erdhi, i kam premtuar se do të trajtohet me respekt dhe ndershmëri e profesionalizëm. Ai është një nga lojtarët më të thjeshtë me të cilët kam pasur marrëdhënie, është një djalë pozitiv dhe jashtë fushe. Ekipi e priti krahëhapur dhe për pak ditë u bë pjesë e grupit. Atë që i kam premtuar, e ka marrë. Komunikimi me të ka qenë: puno lufto e luaj. Pasi firmosi, i thashë bluzën e dytë e dua unë, të parën jepja kujt të duash. Më tha “të parën do t’ia jap babait” e jam dakord në këtë pikë.
Risku - Skuka ishte si një gonxhe që nuk kishte çelur akoma, sado largpamës të ishte. Mund të imagjinosh që çel një lule e bukur, por nuk e di se ku do të të çojë. Kur firmosa me Skukën, ishte një nga rastet më të thjeshta, shpresova më të mirën dhe në momentin që e mora, e mora me idenë që duhet të kontribuonte për ekipin. Është rezultat i punës së tij dhe mbështetjes së ekipit që ai arriti që të shitet në këto shifra.
Puna - Ka ende shumë punë për të bërë, duhet të vijojë të punojë, ka shumë punë përpara. Rruga nga Dibra në Tiranë është e shkurtër, nga Rinasi në Paris, shumë më e gjatë. Këtë diferencë ai duhet ta përballojë.
Superliga - Në këtë kampionat e kemi marrë një pjesë të fryteve të punës, por mund të bëjmë dhe më mirë. Është një shprehje që kampionët fitojnë ndeshjet, skuadra kampionatin. Do ta shohim sa i fortë është ky grup. Kam shumë besim, pasi janë lojtarë të mirë dhe djem të mirë dhe besoj.
Lexo gjithashtu
