Kukësi fitoi me përmbysje ndeshjen përballë Erzenit, në kuadër të javës së 7-të të Superiores. Ekipi verilindor mposhti 2-1 shijakasit.
Pas kësaj sfide për mikrofonat e MCN TV, foli trajneri i Kukësit, Stavri Nica.
“Pësuam një gol, por në pjesën e dytë me lojën që bëmë na dha frytet e duhura. Skuadra reagoi dhe shpresoj të mbajmë këtë ritëm deri në fund”, u shpreh Stavri Nica.
-Në 3 ndeshje 7 pikë...
“Sigurisht që besimi, po të besosh tek stërvitja dhe tek forcat që ke sigurisht që dhe rezultati vjen. Po ngacmove shpirtin do të vijë rezultati”, shtoi më tej trajneri i Kukësit.
“Do menduar dhe punuar akoma më shumë për fazën ofensive pasi e shoh që nuk është besimi i duhur. Po nuk krijove më shumë, goli nuk vjen kollaj. Shpresojmë që skuadra të luajë më agresive. Është diçka që do dhe kohën e vet, por vazhdimisht dita-ditës, skuadra do të rritet”, tha tekniku Nica.
“Asnjë në ekip nuk e ka vendin e sigurtë. Loja do ta tregojë. Në fushë do të futet ai që ka shpirtin e garës. Mendoj që ajo që është më kryesorja, skuadra duhet të ketë më shumë besim. Nuk duhet të tërhiqet, pasi e shof që diçka e tillë ndodh. Nuk kishte zotërim topi, por duhet shumë besim që të kontrollosh deri në fund lojën”, theksoi trajneri i verilindorëve.
-Doni të jeni i qetë që Kukësi të mbijetojë këtë sezon, pasi aktualisht jeni 1 pikë larg vendit të katërt?
“Mendoj ndeshjen e radhës, i bëj hysmetin ndeshjes së radhës dhe si të rris gjendjen fizike. Me këto lojtarë që kemi. Është e kotë të themi se çfarë vendi do të kapim”, u përgjigj Stavri Nica.
Lexo gjithashtu
