Korabi - Laçi 0-0|
Gjyqtar: Kridens Meta
Stadiumi: "Loro Boriçi"
Pjesa e parë- Ka nisur takimi i parë i Superiores ndërmjet Korabit dhe Laçit. Një ndeshje e dyluftuar nga të dyja skuadrat me lojtarët që mundohen të marrin në dorë frenat e lojës. Korabi ka në organikë disa ish futbollistë të Laçit dhe duket sikur ata duan të "hakmerren" ndaj ish ekipit të tyre. Megjithatë duhet theksuar që mbrojtja kurbinase është në ditën e saj ditën e sotme. Ky fraksion loje nuk ka shumë raste për të shënuar, përveç një fragmenti në minutën e 30-të në zonën e Korabit pretenduan për një 11-metërsh pas një ndërhyrje të dyshimtë të Vujadinoviç. Megjithatë për kryesorin Meta, gjithçka është e rregullt. Në minutën e 36-të Pinto i Laçit gjuan me një të djathtë potente, por sfera përfundon ngjitur me shtyllën e djathtë pingule. Minutat e mbetura të lojës nuk sjellin asnjë rast tjetër për shënim. Kështu do të mbyllet kjo pjesë e parë, për t'i lënë vendit fraksionit të dytë.
Pjesa e dytë- Ky fraksion loje nis vrullshëm nga dibranët, të cilët janë më kërkues në dyluftimet një për një. Takimi, ashtu si pjesën e parë, luhet në mesfushë. Laçi luan në mbrojtje dhe kërkon të dalë në kundërsulm, por ekipi i Korabit është i vendosur si duhet. Tekniku Mërgjyshi vendos të fusë në lojë Plakun dhe Nexhipin, të cilët i japin freski lojës së skuadrës së tyre. Është pikërisht Nexhipi, i cili në minutën e 78- të lojës ka një mundësi për të shënuar, por nuk kordinohet siç duhet. Shtatë minuta më vonë, sulmuesi Adelaja, ka një rast të artë për të shënuar, pas një topi që vjen në formë harku nga e djathta. Gjuan me kokë, por sfera përfundon ngjitur me shtyllën e majtë pingule të mbrojtur nga i riu Selmani. Tashmë Korabi është hedhur i gjithi në sulm dhe kërkon të fitojë takimin, mirëpo kurbinasit janë të vendosur mirë në mbrojtje. Në minutën e 89-të Korabi do të kishte kaluar në avantazh, ku Veliaj i vetëm me Selmanin e dërgonin topin në duart e portierit mik. Kështu mbyllet kjo ndeshje e parë e Superiores me skuadrat që marrin nga një pikë.
Lexo gjithashtu
