Shqipëria do të luajë mbrëmjen e sotme një nga ndeshjet më të rëndësishme. Kombëtarja jonë do të përballet me Republikën Çeke në stadiumin “Air Albania” duke nisur nga ora 20:45.
Një ndeshje që pati një interes të gjërë nga tifozët, interes që u pa që në momentin që biletat dolën në shitje. Të gjitha biletat u shitën online në më pak se 2 orë dhe kjo gjë solli që biletat të shiten në treg të zi me çmime të kripura.
Policia e Shtetit njofton se ka identifikuar dhe po procedon penalisht 4 shtetas, të cilët shisnin bileta online me çmime deri në 400 euro.
“Reklamonin në rrjetet sociale dhe shisnin online me anë të mashtrimit, bileta për ndeshjen Shqipëri-Çeki, me çmime deri në 400 euro, identifikohen dhe procedohen penalisht 4 shtetas.
Specialistët për Hetimin e Krimeve Ekonomike dhe Financiare në DVP Tiranë, në vijim të punës për goditjen e veprimtarive kriminale, pas informacioneve të siguruara për disa shtetas, të cilët reklamonin në rrjete sociale dhe shisnin me anë të mashtrimit, bileta për ndeshjen e ditës së sotme, me çmime shumë të larta, menjëherë kanë organizuar punën për identifikimin dhe vënien e tyre përpara përgjegjësisë ligjore.
Në vijim të veprimeve u referuan materialet në Prokurori dhe nisi procedimi në gjendje të lirë për shtetasit S. A., 35 vjeç, R. H., 22 vjeç, A. O., 31 vjeç dhe E. Gj., 34 vjeç, të katërt banues në Tiranë.
Nga veprimet hetimore ka rezultuar se këta shtetas kishin krijuar një skemë mashtrimi për shitjen e biletave për ndeshjen Shqipëri-Çeki, me çmime që shkonin deri në 400 euro”, shkruhet në njoftimin e Policisë.
Lexo gjithashtu
