Armando Sadiku po shpërthen me kombëtaren kuqezi, ku në 9 ndeshjet e fundit ka arritur që të realizojë 5 gola, nga 6 që ka në total. Goli më kryesor i momentit është ai kundër Rumanisë në sfidën e fundit në grup, çka ka bërë që elbasanasit t’i rriten shanset për kalimin në një kampionat më të mirë dhe për shifra të larta, ose rekord për momentin.
Lojtari i Vaduzit që shënoi 7 gola në kampionatin zviceran këtë sezon që sapo është mbyllur, tashmë është në “orbitën” e Gazientepspor, skuadrës që militon në Superligën turke. Gjigantët turq e kërkojnë sulmuesin 25-vjeçar për një shumë prej 700 mijë eurosh. Edhe pse Vaduzi momentalisht shprehet se nuk do e lërë të lirë futbollistin, ai nuk do të qëndrojë aty, sidomos pas kësaj shifre që mund t’i çmend të gjithë.
