Shefi i klubit të Kukësit, Jonuz Hallaçi, përmes një lidhje telefonike për emisionin “Fair Play” në News 24 ka sqaruar edhe një herë incidentin e ndodhur sot me tifozët e Partizanit në stadiumin e Kukësit.
“Ne kishim punuar që problematika që ndodhi, të mos ndodhte. Tifozët e Partizanit u acaruan papritur.
Më vonë, drejtuesit e Partizanit më thanë që ata i kishin goditur me gurë, por një gjë e tillë nuk ndodhi, sepse ka shtëpi private pas stadiumit.
Acarimi i tifozëve të Partizanit erdhi në momentin që ata e kuptuan se nuk po fitonin. Tifozët e kuq kështu sillen kur nuk fitojnë, zihen me policinë dhe thyejnë stola. Nuk ka pasur asnjë kontakt mes tifozëve të Partizanit dhe atyre të Kukësit.
Ne morëm masa për tifozët tanë. Personalisht, unë kam fotografuar sektorin ku do të qëndronin tifozët e Partizanit para ndeshjes, sepse e parandjeja që do të ndodhte ajo që ndodhi dhe që tifozët e kuq do të thyenin stola.
Edhe ato pak stola që ishin të thyer para se të niste ndeshja e sotme, janë thyer vitin e kaluar po nga tifozët e Partizanit.
Mua më vjen keq nëse janë lënduar tifozë të Partizanit, sepse nuk dua që kjo gjë të ndodhë. Nuk dua t’i ndodhë asnjë tifozi, qoftë ai i Kukësit, Partizanit apo tjetër ekipi. Në stadium nuk shkohet për të bërë gladiatorin”, tha shefi i klubit të Kukësit, Jonuz Hallaçi.
Loading ...
