Bruno Telushi ishte largimi i papritur nga radhët e Partizanit në këtë sesion merkato të verës. Mesfushori i të kuqve u “divorcua” pas ndeshjes së Champions League kundër Bate Borisov, përfunduar me shifrat 1-1. Një situatë e pakuptueshme, por që në ditët në vazhdim mund të ketë ndonjë shpjegim.
Në media është bërë me dije se vlonjati nuk ka pranuar stolin dhe ka shprehur pakënaqësi ndaj trajnerit Zoran Zekiç. Kroati ka vënë veton dhe ka pritur dënimin e tij. Masa ka qenë drastike nga drejtuesit të cilët i kanë treguar derën pikërisht kapitenit të skuadrës.
Në fakt kjo nuk është hera e parë që me Telushin veprohet në këtë mënyrë. Në vitin e titullit kampion të Partizanit me në krye trajnerin Skënder Gega, pas trajnerit u largua edhe mesfushori. Për të nuk pati një rinovim dhe asokohe ai reagonte në rrjetet sociale duke treguar mungesën e respektit nga ana e drejtuesve.
Para një sezoni, vlonjati zgjodhi të rikthehej sërish te Partizani duke lënë gjithçka pas, edhe mënyrën se si e larguan. Arriti të fitonte vendin e titullarit duke u zhvendosur në prapavijë, në rolin e qendërmbrojtësit. Pikërisht futja e Sembene në formacion dhe lënia e tij jashtë ka irrituar vlonjatin. Për të dytën herë e pa veten t’i tregohej dera e kryeqytetasve.
Një nga futbollistët e dashur për tifozërinë e Partizanit, largohet sërish në mënyrën më të keqe të mundshme nga skuadra. Respekti për “ushtarin” e përbetuar dhe shiritin e kapitenit mungoi. Ndoshta rikthehet sërish, për të tretën, të vërtetën!
Lexo gjithashtu
