Para ndeshjes
Për herë të parë në historinë e futbollit, derbi më i zjarrtë mes dy rivalëve historikë, Partizani-Tirana u zhvillua jashtë kryeqytetit. "Elbasan Arena" u shndërrua në arenën e zjarrtë për dy tifozëritë, atë të Tiranës, të pozicionuar në tribunën G2 dhe atë të Partizanit të pozicionuar në Tribunën C1.
Në bulevardin "Aqif Pasha", rreth orës 15:00, nisën të dukeshin tifozët e parë të të dy ekipeve, ata që me shumë gjasa kishin mbërritur në Elbasan me makina private. Orët e para ndeshjes ishin të qeta, në baret afër stadiumit dhe përgjatë bulevardit shihje tifozë të të dy ekipeve, të ulur në të njëjtin vend, duke të krijuar edhe habinë se si mund të ndodhë kjo. Situata dukej më shumë se paqësore, ndonëse nga ana tjetër në rrugë patrullonin forca të shumta Policie. Rreth orës 18:00, vetëm një orë para nisjes së sfidës, në parkingun e Elbasan Arena, mbërrijnë autobusët me futbollistët e të dy ekipeve, të shoqëruar nga britmat e tifozëve. Po rreth kësaj ore nisi dhe hyrja masive e tifozëve në stadium, ndonëse ata të Tiranës kishin zënë vend në tribunën G2 më herët se ata të Partizanit.
Gjatë ndeshjes
Ora 19:00, në fushë zbresin të dy ekipet, sfida më e zjarrtë e Superligës shqiptare nis pas rënies së bilbilit të Enea Jorgjit, arbitri kryesor i ndeshjes. Tifozët e Partizanit nisin të shpalosin koreografinë e përgatitur me imazhe dhe banderola, duke formuar fillimisht i inicialet "PMTP" (Përjetësisht Me Ty Partizan).
Ndërsa pas nuk mbetet as tifozëria bardheblu, e cila shpalos banderolën "Të dua Tirona, të dua, me hapat e tua Jetoj", e cila shoqërohej edhe nga një koreografi e përgatitur nga tifozëria, e cila simbolizon lindjen e fëmijës, rritjen dhe vijimësinë e tij, si tifoz i Tiranës. Sfida nis ndërsa nga të dyja tifozëritë nuk mungojnë sharjet respektive, me fraza deri ofenduese edhe për lojtarë apo tifozë VIP. Tifozëria e Partizanit, e cila në këtë rast ishte në cilësinë e ekipit pritës, ishte dhe më aktive me banderola, të cilat u shpalosën në momente të caktuar të ndeshjes.
Në minutën e 59-të, të pjesës së dytë, loja ndalet nga Enea Jorgji, pasi Elbasan Arena "ndizet" nga tymi i shkaktuar nga flakadanët e hedhur në fushë nga tifozët e ekipit të kuq. Rreth 4 minuta u deshën që tymi të largohej nga fusha dhe të riniste loja, e cila në minutat e fundit u bë dhe më e ashpër me rastet e shpërdoruara nga të dy kampet. Por në fund, rrjetat mbetën të pa prekura, derbi përfundon me rezultatin e bardhë, ndërsa tifozët s`ndalen me brohoritma dhe ovacione në favor të ekipeve respektive. Tifozët e Partizanit elektrizohen në çastin që lojtarët afrohen për t'i përshëndetur dhe falënderuar, duke u hedhur dhe fanellat drejt tyre.
Pas Ndeshjes...
Policia kishte paralajmëruar masa të rrepta për derbin kryeqytetas, që për herë të parë luhet jashtë tij. 300 efektivë të policie, mes tyre dhe FNSH, ishin të pranishëm për të garantuar sigurinë për zhvillimin normal të ndeshjes. Në krye të tyre ishte Drejtori i Përgjithshëm i Policisë së Shtetit, Haki Çako. Por ndryshe nga sa ishte paralajmëruar në media, në rrjetet sociale apo me deklaratat e zyrtarëve të dy klubeve para ndeshjes, në fund nuk ishte vetëm rezultati paqësor, por edhe ndarja mes dy tifozërive. I vetmi problem ishte trafiku i krijuar në dalje të Elbasanit, për shkak të automjeteve të shumta të ardhura në qytet. Ndërkohë Elbasan Arena, një ditë pas derbit kryeqytetas përgatitet të pres një tjetër derbi. Elbasani-Turbina dy skuadrat e rrethit të Elbasanit do të përballen sot, ndërkohë punonjësit e stadiumit kanë nisur punën që në orët e para të ditës për pastrimin e mbeturinave të lëna pas ndeshjes nga tifozët.
I pyetur në telefon, Drejtori i Stadiumit Dritan Kadia, tregon se në asnjë prej tribunave nuk ka pasur dëmtime. "Nuk ka asnjë dëmtim fatmirësisht në asnjë prej tribunave. Ekipi pritës kishte garantuar se do të merrte përsipër të paguante dëmet nëse do kishte, por fatmirësisht nuk ka"- thotë Kadia, ndërsa pohon se punëtorët po punojnë për pastrimin e stolave në shkallët e stadiumit.
Lexo gjithashtu
