Tashmë te Partizani ka një çështje për të zgjidhur Starova-Trashi. Trajneri i të kuqve është përplasur ditën e djeshme me mesfushorin gjatë miqësores të zhvilluar në Antalia. Ashtu siç njoftoi newsport.al, debati ka degraduar në të shara e fyerje nga të dy palët.
Sot, në shtypin e shkruar Starova pretendonte se ka qenë mesfushori ai që ka fyer atë, por edhe klubin e Partizanit duke hedhur fanelën për tokë. Sot, të kuqtë do të kthehen për në Shqipëri dhe pak para nisjes, newsport.al kontaktoi sërish Lorenc Trashin. Këtë herë mesfushori nuk u kursye aspak, por i "zbrazi" të gjitha teksa deklaroi:
"Profesor Starova për të justifikuar veten ka shpikur shumë fjalë që s'janë të vërteta. Në radhë të parë unë s'i jam drejtuar me tone të larta atij, po e kundërta. Jam ulur në pankinë shumë i qetë dhe i kam folur tamam.
"Profesor pse s'më le dhe pak të merja pak përgatitje?" Se më ka zëvendësuar në minutën e 60-të dhe jo 75-të siç thotë ai. Në atë moment ai më është kthyer me tone të ashpra, që do të thotë se mezi ka pritur një debat me mua. Profesor Starova mos të bëjë tani si shenjtor. Kur Partizani s'ka kontingjentin e duhur të lojtarëve dhe shprehet që unë si trajner s'i kam thënë të largohet nga ekipi. Ai është shprehur shumë qartë dhe aty kanë qenë shumë lojtarë dhe stafi bashkë për të vërtetuar gjithçka që ai ka thënë kundrejt meje.
"Ma qerroni nga hoteli, nuk dua ta shoh më në ekip". Pasi ka thënë kështu, unë jam çuar dhe i kam thënë: "Profesor, qëndroi besnik fjalëve që po thua. Nëse je burrë thuaja edhe presidentit në sy tim, që nuk e dua më Trashin. Edhe ai e ka pranuar duke më thënë "OK".
Më pas i dhashë dorën, ai më refuzoi. "Mos ma jep as dorën tha", edhe unë vazhdova drejt dhomave të zhveshjeve. Teksa po largohesha ai nuk e la me kaq, por vazhdoi të më ofendonte nga fjalë më të ndyrat. Më ka ulur dhe më ka fëlliqur në sy të shokëve e stafit.
Iu ktheva në atë moment dhe hoqa bluzën. Ia lashë te pankina. Absolutisht nuk e kam hedhur. E hoqa dhe i thashë: "Për këto fjalë që më the, unë dhe ti e kemi mbyllur".
Dua t'i drejtohem profesor Starovës duke i thënë që mos të justifikojë veten te tifozët e te presidenca. Mos të shfajësohet ndaj publikut me arsyen se Trashi ka hedhur fanelën se ka shumë njerëz aty që e vërtetojnë këtë gjë. Ofendimet e Starovës kundrejt meje janë një mllëf i mbledhur prej kohësh. Më në fund ia arriti qëllimit, ta nxirrte atë mllef. Është shumë e thjeshtë, kur nuk e do një lojtar. Pse nuk i thua presidentit: "Nuk e dua në ekip Trashin, s'më shërben për asgjë". Edhe unë shoh karrierën time.
Gjithsesi unë personalisht e quaj të mbyllur me Starovën. Nuk tërhiqem aspak pas çfarëdo lloje mase të merret kundër meje. Edhe një gjobë, unë absolutisht nuk e pranoj sepse jam me të drejtë dhe s'lejoj njeri ta mohojë këtë gjë. Kur kam qenë gabim, kam qenë unë ai që i kam kërkuar falje profesorit. Por, tani jo më! Është totalisht gabim. Më ka ofenduar shumë rëndë", ka përfunduar Lorenc Trashi për newsport.al.
Pritet me interes të mësohet se si do ta zgjidhë klubi i Partizanit këtë çështje të re. Starova apo Trashi? Cili do të dënohet? Pritet ta mësojmë ditët në vazhdim, sigurisht fillimisht pritet qëndrimi zyrtar i klubit... /Retin TOKA/
Lexo gjithashtu
