Bruno Telushi është padyshim një nga lojtarët më të mirë të Superligës shqiptare. I cilësuar si "ushtari" i çdo ekipi për të cilin kontribuon, vlonjati ishte në qendër të vëmendjes në këtë merkato vere. Fillimisht u tha se do të qëndronte te Partizani, ndërsa në fund zgjodhi t'i bashkohej verilindorëve.
Newsport.al ka mësuar prapaskenat e këtij transferimi. Me t'u emëruar në krye të Kukësit, trajneri Gega kishte shprehur hapur dëshirën për ta pasur luftarakun në ekip. Nga ana tjetër, Telushi donte të respektonte fanelën e Partizanit, por edhe drejtuesit për sezonet e mrekullueshme të kaluara në atë klub.
Kësisoj, fillimisht vlonjati priti ofertën e bërë nga të kuqtë. Nuk pati asgjë konkrete, por i nisur nga zërat nëpër media, ai kishte pritur një takim "kokë më kokë" me presidentin Gaz Demi. Kreu i klubit të kuq ishte shprehur se i ka deleguar çdo gjë rreth merkatos, drejtorit të përgjithshëm, Olsi Rama. Paraelisht ky i fundit i tregoi vlonjatit planet me trajnerin e ri, ku Telushi spostohej automatikisht si futbollist rezervë.
Në këtë mënyrë, Telushi në një farë mënyre u detyrua të largohej nga Partizani. Një lloj tradhtie kjo për vlonjatin që dha gjithçka për të kuqtë, por në fund nuk u arrit të kishte as një takim me presidentin Gaz Demi që e kishte ndër të preferuarit e tij. Vlerat e Telushit i njeh çdo sportdashës shqiptarë. Padyshim më shumë se askush, Skënder Gega. Pas ndeshjes me Slavian e Sofies ku luftaraku ishte ndër më të mirët në fushë, ndoshta te Partizani janë penduar dyfish për largimin e tij.
Lexo gjithashtu
