Emiliano Vila ishte një nga tre futbollistët e larguar nga skuadra e Partizanit. Mesfushori i të kuqve zyrtarizoi ditën e djeshme divorcin me 15-herë kampionët e Shqipërisë, e kërkuar kjo nga ana e drejtuesve të Partizanit. Në mënyrë të papritur ata larguan një nga titullarët e ekipit të kuq që për disa sezone me radhë ka kontribuar në skuadër.
Newsport.al ka mësuar sot një prapaskenë për 29-vjeçarin durrsak. Burime të besueshme pranë lojtarit bëjnë me dije që Emiliano Vila kërkoi në merkaton e verës largimin nga Partizani. Mesfushori durrsak kishte një ofertë të majme nga klubi i Sepahanit në Iran, i cili i kishte ofruar një kontratë vjetore plot 200 mijë euro.
Por, drejtuesit e kuq së bashku me stafin teknik nuk e pranuan kërkesën e tij për t'u larguar pasi ishte në planet e skuadrës për këtë edicion futbollistik. Në mënyrë të papritur ishin po ata që vendosën në këtë merkato dimri që Emiliano Vila duhet të largohet së bashku me Krasniqin dhe Malotën. Kësisoj ish-mesfushori i kuq humbi një mundësi të "artë" për t'u transferuar në kampionatin iranian. /Newsport.al/
Lexo gjithashtu
