Tirana arriti të merrte një barazim në ekstrem të ndeshjes mbrëmë ndaj Dinamo Batumi, ndeshje e vlefshme për raundin e parë kualifikues të Conference League. Bardheblutë sfidonin gjeorgjianët me plot 6 lojtarë që debutonin nga minuta e parë. Një sfidë më vete kjo e trajnerit Shehi.
Heroi i kryeqytetasve u bë Regi Lushkja, i cili e nisi nga stoli sfidën. Prej javësh mesfushori ka qenë në ‘kokën’ e trajnerit Shehi pasi dilema për formacionin titullar ishte vetëm mes tij dhe Hilës. Një pikëpyetje e madhe të cilës iu përgjigj vetë ’10-shi’ në fushë.
Me hyrjen e tij në minutën e 77’, Tirana ndryshoi fytyrë. Loja e bardhebluve iu dha këmbëve të kavajasit dhe menjëherë u krijua harmoni me dy mesfushorët e tjere, Hila e Deliu por edhe me linjën e majtë, Haxhiu e Përgjoni.
Mesfushori tentoi 3 herë të godiste portën, e para iu bllokua ndërsa e dyta u ndal mrekullisht nga portieri. E treta e vërteta, një gjuajte me kokë në cepin e portës ngriti në peshë stadiumin në minutën e 93’ duke i dhënë një barazim jetik Tiranës që shkon e barabartë në ndeshjen e kthimit.
Lexo gjithashtu
