Shqipëria ka fatin të jetë një prej 24 skuadrave europiane, që do marrin pjesë në Euro 2024. Në vazhdim Newsport.al do iu tregojë për stadiumet gjermane, që Kombëtarja do shkelë me shpresën e kalimit të grupit B.
Stadiumi i Dortmundit, “Signal Iduna Park”, është i njohur për “Murin e Verdhë”, ku tifozët janë ndër më të zjarrtit në Europë. Shqipëria do luajë më 15 qershor ora 21:00, ndeshjen e saj hapëse kundër Italisë. 66 mijë vende është kapaciteti i gjithë stadiumit dhe padyshim shqiptarët pritet të jenë të konsiderueshëm në numër.
Përballja ballkanike me Kroacinë do mbahet më 19 qershor ora 15:00, në Hamburg. Stadiumi “Volksparkstadion” i këtij qyteti është po ashtu i veçantë, pasi ka pritur finalen e Europa League në vitin 2010. Ka një kapacitet prej 50 mijë vendesh.
Sfida mbyllëse në grupe do jetë kundër Spanjës, më 24 qershor ora 21:00. Stadiumi i Dusseldorfit “Merkur Spiel-Arena” është një nga stadiumet me kapacitetin më të vogël në Euro 2024. Me 40 mijë vende, është shtëpia e Fortuna Dusseldorf në Gjermani. Po ashtu vlen për t’u përmendur se në Dusseldorf janë të vendosur shumë shqiptar.
Këto janë dhe tre stadiumet, që Kombëtarja ka fatin t’i shijojë me ndeshje të mëdha. Kujtojmë se afati për t’u futur në shorteun e UEFA-s për sigurimin e biletave është deri nesër, më 12 dhjetor.
Lexo gjithashtu
