Nesër Tirana do të luajë në orën 19:00 në stadiumin "Selman Stërmasi" kundër Partizanit. Trajneri i bardhebluve, Mirel Josa ka dalë në një konferencë për shtyp teksa ka analizuar situatën në skuadër dhe gjithashtu ka treguar objektivin e ekipit në këtë sezon siç janë Kupa e Shqipërisë dhe mbijetesa. Josa duket i pakënaqur nga grupi aktual që ka në dispozicion, teksa shpesh herë thekson që këtë sezon bardheblutë nuk mund të quhen ekip. "Timonieri" i 24-herë kampionëve të Shqipërisë u shpreh:
"T'i thuash ndeshje e rëndësishme është shumë pak. Partizani ka objektiva madhore në këtë ndeshje. Një objektiv që ka kohë që e ndjek. Ndërsa ne, skuadër që jemi në udhëkryq. Jam shumë i bindur se skuadra do të bëjë më të mirën për të dalë nga ky udhëkryq. Duhet pasur parasysh se do të kemi përballe një skuadër që do të jetë agresive në çdo drejtim.
Nuk kam thënë që kthesa do të vijë në ndeshjen me Partizanin. Skuadra edhe në ndeshjet e tjera ka bërë atë që ka pasur mundësi me individët që ka. Nuk është e thënë që themi se duhet të fitojmë se s'bën ndeshjen me Partizanin. Të gjithë duam ta fitojmë, por kemi përpara një skuadër të uritur për të fituar titullin. Kemi një skuadër që kërkon me çdo kusht titullin, ndaj e vlerësojmë maksimalisht. Tirana ka uri për t'u bërë skuadër, të bëhemi njëherë skuadër dhe kjo është më kryesorja për ne.
E konsiderojmë ndeshje normale të kampionatit.Të gjithë gabimet që kemi bërë deri tani, nuk mund të rregullohen vetëm në ndeshjen me Partizanin. Prestigji i derbit nuk është për mua, Tirana- Partizani. Unë e kam ndjerë si lojtar, por edhe si futbollist. Problemi më madhor është që Tirana do pikë.
Unë nuk them që është çështje prestigji. Nuk them që skuadra nuk ishte e mobilizuar në ndeshjen me Kukësin. I kam thënë fjalët pas ndeshjes me Kukësin dhe s'ka nevojë për më shumë. Mua më intereson e ardhmja e skuadrës. E ardhmja është e nesërmja dhe më vonë. Skuadra ka prodhuar lojë, është munduar për të luajtur. Do të mundohemi përsëri t'i marrim maksimumin skuadrës. Humbja nuk është e mirë për asnjë ekip, por të japë maksimumin si në takimin e fundit me Partizanin.
Unë asnjëherë nuk kënaqem me barazim, edhe skuadra po ashtu. Barazimi do të më kënaqte nëse ekipit do t'i duhej vetëm 1 pikë. Unë dua fitoren, por nuk mund të fluturojmë. Pasi duihet të shohim ç'skuadër kemi përpara. I vlerësoj maksimalisht djemtë e Partizanit.
Skuadra është në ndërtim e sipër. Lojtarët që po luajnë tani dhe ata që do futen janë në provë, për sa i përket Tiranës për vitin e ardhshëm. Mua s'më intereson fare premioja. Lojtarëve ndoshta po, për sa i përket anës ekonomike. Edhe për ndeshjet e tjera nuk është se premioja motivon lojtarët. Nuk është gjë kryesore për një futbollist apo dhe një trajner. Presidenca e pa të arsyeshme për të vendosur premio. Pse ekipi mos t'i marrë të dyja si premion dhe rezultatin.
Kam 1 kontratë 18 mujore dhe do të shohim si do të shkojnë punët. Nuk më mban kontrata në klub, por objektivat.Nuk është filozofi e madhe të mësosh formacionin e Tiranës.
Tirana do të luajë për veten e vet. Gjithsecili jep mendimin e vet. Tirana nuk luan për aleancë, por luan se është Tiranë. Sigurisht aq sa ka mundësi. Mos t'i futemi gjërave të tjera. Ka kohë, rruga do të tregojë se për çfarë do të luajë Tirana. Kemi qenë ne fajtorë që i kemi bërë tifozët të pakënaqur. Ne duam t'i kemi në stadium, jo se nuk duan, por kështu e kanë vendosur. Sa më parë të kthehen aq më mirë do të jetë.
Tirana është ekip prove, ekip që po ndërtohet. Derbi është një derbi që mbaron nesër. Edhe si futbollist ose si trajner dua ta fitoj një derbi siç e kam fituar ose e kam humbur. Gjëja kryesore është se në ç'baza do të ndërtohet skuadra.
Unë dua të realizoj të gjitha objektivat, si Kupën e Shqipërisë ashtu edhe mbijetesën. Këtë vit Tirana s'ka qenë skuadër. Mund t'i ketë pasur shumë faktorë për të qenë, por në fakt nuk ka qenë skuadër", përfundoi Mirel Josa.
Kujtojmë që ndeshja mes Tiranës dhe Partizanit është e vlefshme për javën e 31-të të Superiores. Bardheblutë luftojnë për të qëndruar mes më të mirave teksa gjenden në vendin e gjashtë me 32 pikë, ndërsa Partizani ndodhet në vendin e dytë me pikë të barabarta me Kukësin kryesues.
Lexo gjithashtu
