Kapiteni kuqezi, Lorik Cana, kthehet sot në formacion, pasi e shleu pezullimin nga kartoni i kuq i marrë në ndeshjen me Zvicrën. Por dilema është se ku do të luajë lideri i Kombëtares sonë, në qendër të mbrojtjes, si zakonisht kohët e fundit, apo do të kthehet në rolin e tij natyral, në atë të shkatërruesit në mesfushë. Edhe vetë trajneri De Biazi e ka këtë dilemë, sepse të gjithë e panë që mbrojtja funksionoi shumë mirë me dyshen Mavraj-Ajeti. Në mesfushë mungon Kukeli i pezulluar me kartonë dhe gjasat janë që në vendin e tij të jetë Lorik Cana. Por këtë rol trajneri i kuqezinjve mund t’ia besojë edhe Bashës, lojtar me shumë përvojë. Kjo do të thotë se Cana luan në mbrojtje dhe Ajeti ulet në stol. Lila është i favorizuar për krahun e djathtë të mesfushës ndaj Roshit, ndërsa për sulmin Sadiku mbetet ende zgjedhja e parë, pavarësisht se mund të jetë lodhur dhe Cikalleshi mund ta zëvendësojë shumë mirë. Për të gjitha këto trajneri De Biazi dhe stafi i tij do të vendosin në momentet e fundit para ndeshjes së mbrëmjes me Rumaninë. Ka edhe nga ata që mendojnë se Cana duhet ta nisë nga stoli.
Lexo gjithashtu
