Migen Memelli është rikthyer për të folur për kohën e tij si trajner i Vllaznisë. Memelli, i ftuar në emisionin “EliteShow” në SuperSport tregon se si ai dhe Elvis Plori e riformatuan skuadrën e Vllaznisë. Ai gjithashtu shton se nuk ka patur aspak presion në kohën kur ishte trajner i shkodranëve. Gjithashtu, Memellit nuk i pëlqejnë aspak rrjetet sociale, në të cilat 43-vjeçari thotë se të gjithë marrin rolin e trajnerit.
“Me Plorin kërkuam të riformatonim skuadrën, ikën Latifi, Gurishta, Marku, Zogovic. Në atë periudhë rëndësi kishte rëndërtimi i skuadrës. Morëm Grudën, Krymin, Smajlin, Stojanovic. Morëm një portier pa eksperiencë si Qarri. Me pak fat mund të kalonim turin me Linfield në Europë.
Duhej kohë që skuadra të kolaudohej, kishte mungesa dhe në 10 javët e mia skuadra nuk ishte kurrë e plotë. Në dy ndeshje, Egnatia dhe Tirana kemi luajtur me 10 lojtarë për karton të kuq. Nuk dua të justifikohem, por më vjen mirë që Vllaznia ka gjetur ritmin dhe 11-tëshen e duhur. Dua ta shoh kampione!
Presioni te Vllaznia? Nuk e kam ndjerë. Problem janë rrjetet sociale, dy milionë e gjysmë këtu tek ne bëjnë trajnerin. Një president klubi që nuk ndikohet nga rrjetet sociale është Ardian Takaj. Unë jam fokusuar te puna dhe nuk e kam ndjerë presionin. Ne si trajner nuk e ruajmë institucionin. Nga jashtë është e lehtë të flasësh, ke trajnerë që bëjnë detyrën dhe më pas bëjnë opinionistin. Trajnerët kur dalin në studio, duhet të mbrojnë statusin e trajnerit”, është shprehur ish-trajneri i Vllaznisë.
Lexo gjithashtu
