Dritan Dervishi ishte i pranishëm në derbin Partizani - Tirana që u luajt të hënën në staidumin "Selman Stërmasi" në kryeqytet. Ish-drejtori i të kuqve dhe i Kukësit ishte me një mision të qartë në Shqipëri, për të vëzhguar disa lojtarë për llogari të Hellas Verona në Itali. I kontaktuar nga newsport.al Dritan Dervishi ka zbuluar se ka vëzhguar dy futbollistë në derbi, por gjithashtu tregon që ka mbyllur marrëveshjen me një lojtar të Kombëtares për ta transferuar në klubin italian.
"Isha në derbi për të parë nga afër 2 lojtarë. Bëra skedën teknike për ta, për llogari të Veronës ku vëzhgova dhe përmirësimet e këtyre dy futbollistëve. Nuk mund të përmend emra dhe nuk mund të konfirmoj nëse bëhet fjalë për Fejzullahin ose jo. Ka një problem me pasaportat dhe një tjetër më i rëndësishëm që Veron nuk ngjitet në Seria A. Për këta lojtarë do të bisedojmë shumë shpejt me presidentin Gazment Demi, dhe iu garantojmë që është i vetmi person që do të kontaktojmë në klubin e kuq. Mund të kërkojmë dhe huazim me të drejtë blerje. Megjithatë asgjë nuk është e konfirmuar, pasi fjalën fundit do ta thonë Demi dhe Setti, presidenti i Veronës", tha ai.
Në lidhje me lojtarin e Kombëtares që ish-drejtori i kuq do të transferojë te Verona, Dervishi deklaroi:
"Me një lojtar të Kombëtares që luan në Europë, iu konfirmoj që e kemi mbyllur dhe sezonin e ardhshëm ai do të jetë pjesë e Veronës. Për respekt të klubit ku ai luan nuk mund t'iu tregoj emrin, pasi dhe ne jemi në një fazë delikate në kampionat".
Dervishi nuk ndalet këtu, por flet dhe për zhgënjimin që mori në derbi nga ana e disa zyrtarëve të Partizanit: "Në Tiranë mbeta i zhgënjyer. Disa drejtues të Partizanit as nuk më përshëndeten. Për një moment mbeta keq, nga ana njerëzore. Megjithatë s'ka problem për mua. Unë vazhdoj punën time pa i futur dorën në xhep njeriu. Vij me kokën lart në Shqipëri, për atë që arrita të bëj në kampionatin shqiptar. 1 përqind kam dhe unë meritë nga arritja e vitit të kaluar. Të shohim këtë vit çfarë do të përmirësojnë këta dhe mos të harrojmë që këtë vit familja Demi nuk kurseu asgjë për t'i plotësuar çdo dëshirë".
I pyetur nëse mendon rikthimin në Shqipëri për të drejtuar një klub futbolli, Dervishi u përgjigj: "Jo! Dhe e them me siguri të plotë, pasi roli që kam te Verona më pëlqen dhe më plotëson në çdo ambicie time personale. Në Shqipëri kthehem vetëm në qoftë se familja Nuri i futet futbollit (qesh)". / Retin TOKA/ NEWSPORT.AL
Lexo gjithashtu
