Herdi Prenga nuk figuron në grumbullimet e 7 ndeshjeve të fundit që ka zhvilluar skuadra e Lokomotivës së Zagrebit në kampionatin e Kroacisë.
Qendërmbrojtësi i Shpresave kuqezi nuk është përfshirë nga trajneri i Lokomotivës as në pankinë, ndërsa ndeshja e fundit që ai ka qenë pjesë e skuadrës daton më 24 korrik të këtij viti, në ndeshjen e dytë të kampionatit kundër RNK Split. Prenga ishte aktivizuar edhe në takimin e parë të sezonit, në atë kundër Dinamos së Zagrebit. Në të dyja këto takime, Herdi Prenga figuron i ndëshkuar me kartonë të verdhë.
Më pas, asnjë lajm nga qendërmbrojtësi i Shpresave kuqezi, ndërsa nuk figuron as si i dëmtuar në radhët e skuadrës së Lokomotivës së Zagrebit. Në 7 ndeshjet e fundit, ndryshe nga Grezda dhe Çekiçi që janë përfshirë në ekip dhe janë aktivizuar në disa prej tyre, Prenga nuk ka qenë i grumbulluar.
Së fundmi, Lokomotiva e Zagrebit ka huazuar nga Dinamo e Zagrebit edhe Amir Rrahmanin, pikërisht një qendërmbrojtës, ish pjesë e Shpresave kuqezi, tashmë lojtar i përfaqësueses së Kosovës.
As mediat kroate nuk kanë raportuar asnjë lajm të ri për Prengën dhe të ardhmen e tij te skuadra e Lokomotivës së Zagrebit.
Nuk dihet se cili është shkaku që Prenga nuk është përfshirë në skuadër në 7 ndeshjet e fundit, ndërsa ideja për ta shitur apo huazuar tashmë nuk figuron si mundësi, sepse merkatoja është mbyllur.
[gallery columns="1" size="full" ids="37000"]
Lexo gjithashtu
