Liga Unike ka dalë në një deklaratë zyrtare për vijushmërinë e kampionatit që bashkonte ekipet e basketbollit për Shqipërinë dhe Kosovën.
Shkak për deklaratën e sotme është bërë tërheqja nga gara e klubit të Tiranës dhe Teutës nga ky kompeticion. Ky veprim ndikon në mënyrë të drejtpërdrejtë në zhvillimin e aktivitetit.
Deklarata e Ligës Unike:
"Vendim i Bordit Drejtues të Ligës Unike
Bordi Drejtues i Ligës Unike sot më 18.11.2022 në Tiranë ka marrë vendim që të pezullojë aktivitetin e Ligës Unike për Meshkuj, ndërsa do të vazhdojë me zhvillimin e aktivitetit në konkurrencën e femrave.
Deri te ky vendim Bordi Drejtues i Ligës Unike ka ardhur pas takimit disa orësh me klubet shqiptare sot në Tiranë në prani edhe të dy presidentëve të Federatave themeluese të kësaj lige.
Për shkak të tërheqjes së dy ekipeve nga Shqipëria, Tiranës dhe Teutës është i pamundur vazhdimi i garës në formatin e paraparë, prandaj Bordi Drejtues i Ligës Unike ka marrë vendim pezullimin e garës dhe do të vlerësojë opsionet e ristrukturimit të saj.
Vendimi hyn në fuqi në ditën e miratimit të tij.
Në emër të Bordit Drejtues të Ligës Unike,
Ilir Trebicka
Kryetar
Liga Unike"
Lexo gjithashtu
