NEWSPORT.AL ka nisur sondazhin për personazhin e vitit. Ata janë persona që në një mënyrë ose tjetër kanë lënë gjurmë në historinë e sportit shqiptar të këtij viti. Kanë bërë që emri i Shqipërisë të përmendet në gjitha mediet, qofshin ato kombëtare apo ndërkombëtare.
Kjo tablo simpatike nis me presidentin e Federatës Shqiptare të Futbollit, Armand Dukën që për herë të parë në historinë e futbollit tonë arriti të ndërtonte dhe t'i jepte jetë një stadiumi, më i bukuri në Ballkan, "Air Albania Stadium". Padyshim personazh për këtë vit që lamë pas duke arritur të fitojë edhe një vend si anëtar i Komitetit Ekzekutiv të UEFA-s.
Nuk mund të qëndrojë pas, as më shumë e as më pak, i pakrahasueshmi, Skënder Gega. Fjalë-pak e punë-shumë, serioziteti virtyt i lindur bashkë me të, arriti të rikthente pas 26 vitesh titullin kampion te Partizani. Një ëndërr të së shkuarës që tropojani e vuri në jetë duke e bërë realitet mes kryeqytetit, pas një ndeshje historike kundër Tiranës. Kampionët në fuqi janë ata, të kuqtë e Ner Gegës.
Igli Tare vijon të surprizojë dhe të lartësojë emrin e shqiptarëve në Europë. U shpall drejtori më i mirë sportiv në Seria A dhe është në garë për drejtorin më të suksesshëm në kontinetin tonë.
Ish-shtatlartin e sulmit e ndjek një tjetër emër, këtë herë pjesë e fushës së blertë. Zbulim i këtij edicioni, ftesë nga mosha 19-vjeçare në Kombëtare, një lojtar që premton shumë. Marash Kumbulla vlen miliona euro, padyshim e meriton një vend në këtë sondazh të Newsportit.
Fushës së blertë i bashkohen edhe dy bilbila ndërkombëtarë. Enea Jorgji ka arritur majat së bashku me Emanuela Rustën duke u vlerësuar maksimalisht nga UEFA dhe FIFA. Ndeshje të niveleve të larta që janë gjykuar me sukses nga dy gjyqtarët e elitës sonë.
Veç futbollit, një hapësirë të veçantë zë basketbolli me Endrit Hysenagolli, qendrën më të mirë në historinë e koshit shqiptar apo dhe volejbolli me presidentin e Partizanit Rogert Huqi që arriti t'i çonte vajzat e rrjetës së kuqe deri në eliminatoret e Champions League.
Nuk mund të mungojnë në këtë sondazh medaljet e peshëngritësve Briken Calja dhe Erkand Qerimaj apo rekordet e atletëve Izmir Smajlaj dhe Luiza Gega.
Muskujt kuqezi përfaqësohen nga Florian Marku që nuk po njeh kundërshtarë në ring, ndërsa pak më tutje është Eklent Kaçi, "snajperisti" i bilardos. Laçiani, një emër fare pak i përmendur, por që po mrekullon me talentin e tij në këtë sport.
Jo më kot kemi lënë të fundit, Lorenc Trashin, futbollistin më të mirë të vitit të shkuar. Mëngjërashi i kampionëve fitoi një vend në Kombëtare, arriti të shënonte dhe e ardhmja duket e ndritur. Një lojtar asesi s'mund të ecë përpara pa përkrahjen e tifozëve. Trashi ka një tifoz special që tashmë e mbështet dhe e ndjek gjithmonë nga qielli.
Nuk mund të mbetej jashtë këtij sondazhi emri i të voglit Leo Cara që ka lënë gjurmë në memorien e gjithë tifozëve shqiptarë. Në çdo ndeshje, mbi një karrocë, Leo ishte në mbështetje të Partizanit. Fatkeqësisht jeta u tregua e ashpër me të dhe vogëlushi nuk arriti ta fitonte betejën me sëmundjen. Ëndrra e titullit për të vazhdoi, megjithatë ishin të kuqtë që menduan duke ia bërë dhuratë atje ku është.
Ju mund të votoni për personazhet tuaj të preferuar vetëm një herë. Deri në datën 28 dhjetor në orën 22.00. Mund të votohet vetëm një herë. Nëpërmjet votave tuaja, do të zgjedhim personazhin e vitit te NEWSPORT, pavarësisht se secili prej tyre, ka dhënë kontributin e vet.
[poll id="72"]Lexo gjithashtu
