Ish-drejtori sportiv i Lazios, Igli Tare ka folur në një intervistë për portalin gjerman “TZ”, në prag të ndeshjes së kthimit në Champions League, ku ekipi italian do të përballet me Bayern Munich.
Ndeshja e parë u fitua me rezultatin 1-0 nga “Biancocelestit” me golin e Ciro Immobile dhe Tare thotë që bavarezët do ta kenë të vështirë edhe pse luajnë në shtëpi.
“Është një ndeshje shumë e rëndësishme, Bayerni ka avantazhin që këtë ndeshje e luan në shtëpi përballë tifozëve. Por gjithsesi nuk do të jetë një detyrë e lehtë as për ta”, u shpreh fillimisht ish-lojtari i Kombëtares shqiptare.
Ndryshe nga ndeshja e 3 viteve më parë?
“Këtë e dëshmon 1-0 në ndeshjen e parë. Është një Lazio shumë më ndryshe nga 3 vite më parë. Në atë kohë ndeshja e dytë ishte thjeshtë për statistika, pasi të parën Bayrni e fitoi 4-1. Ndërsa sot kushtet janë krejtësisht ndryshe. Mendoj se Bayerni e nënvlerësoi Lazion. Ata nuk e konsideruan si një ekip me përvojë, por tashmë ata janë të itllë. Kanë lojtarë që kanë luajtur në ndeshje të rëndësishme.”
A është Bayerni më i dobët se në vitin 2021?
“Për mendimin tim, Bayerni mbetet favorit. Megjithatë, Lazio luajti një ndeshje të madhe në Romë. Për të shkuar sa më larg në një kompeticion si Champions League është e rëndësishme të shmangësh dëmtimet në momentet vendimtare dhe të luash me vazhdimësi deri në fund të ndeshjes. Bayernit i mungon kjo vazhdimësi këtë sezon, nuk është më skuadra që ishim mësuar të shihnim. Këtë e dëshmon edhe diferenca prej 10 pikësh që ka me Leverkusenin në kampionat.”
Forma aktuale e Lazios?
“Me Milanin ata merituan të fitonin. Fatkeqësisht arbitri pati një ditë të keqe dhe vendimet e tij patën një ndikim të madh në rezultatin përfundimtar. Megjithatë, Lazio nuk po kalon një periudhë të mirë në kampionat pasi ka 3 humbje në 4 ndeshjet e fundit.”
Sfida e nesërme në Champions?
“Lazio nuk ka asgjë për të humbur. Ata duhet vetëm të shkojnë në Mynin dhe të përpiqen të përsërisin ndeshjen e parë. Ata kanë një mesfushë të shkëlqyer dhe një mbrojtje solide. Nëse edhe sulmuesit do të jenë në ditë të mirë, gjithçka mund të ndodhë.”
Lexo gjithashtu
