Takimi i Fushë-Krujës ndaj Kastriotit mund të ketë qënë i fundit për Fidan Alitin me Skënderbeun.
Mbrojtësi duket se ka gjetur gjuhën e përbashkët me drejtuesit korçar për tu larguar drejt një aventure të re, e cila pritet të nis shumë larg. Bëhet fjalë për Suedinë dhe konkretisht në futbollin e elitës së këtij shteti.
Aty, Aliti ka arritur akordin me skuadrën e Kalmar, duke ndjekur në këtë mënyrë hapat e Etrit Berishës, i cili në të kaluarën ka veshur fanellën e kësaj skuadre. Për të pasur shërbimet e Alitit, Kalmar besohet se do të derdh në arkat e Skënderbeut rreth 150 mijë euro, ndërkohë që për mbrojtësin është përpiluar një kontratë katër vjeçare.
Ky do të ishte ekipi i gjashtë në karrierën e 25 vjeçarit, që në të kaluarën ka veshur fanellën e Old Boys, Luzern, Sherif Tiraspol dhe Slaven Belupo.
Megjithatë, ende pritet konfirmimi i palëve dhe zyrtarizimi i marrëveshjes.
Lexo gjithashtu
