Tifozët e Partizanit janë dënuar javën e kaluar nga FSHF me 4 ndeshje jashtë stadiumit.
Në faqen zyrtare në "Facebook", tifogrupi "Ultras Guerrils" kanë njoftuar për protesta te zyrat e FSHF-së. Lidhur me këtë fakt, ish drejtori i klubit të Partizanit, Dritan Dervishi, në prononcimin e dhënë për newsport.al ka thënë se nuk është faji i federatës, por i disa presidentëve dhe aleancave të klubeve.
Dervishi i bën thirrje dhe tifozëve që mos gabojnë duke protestuar kundër federatës.
"Në këto momente. futbollit tonë i duhet një tavolinë rrumbullake ku të jenë të pranishëm të gjithë përfaqësuesit e tifozerive. Të ulen e të diskutojnë me FSHF-në për problemet dhe vështirësitë që kanë tifozët nëpër stadiume me Policinë e Shtetit, e cila është e papërgatitur për aktivitete sportive.
Unë kam respekt të veçantë për grupin "Ultras Guerrils", por ata po gabojnë që nesër të dalin pranë zyrave të FSHF-së. Partizani nuk po sulmohet nga FSHF, por po sulmohet nga aleancat që disa klube kanë, ato klube që vjet na hoqën titullin kampion. Po sulmohet nga presidentët që korruptojnë lojtarë, arbitra e kush t'i dalë përpara, vetëm e vetëm për të vjedhur djersën tonë.
Ka ardhur koha që prokuroria të ndërhyjë dhe të hetojë. Futbolli është i tifozëve dhe u duhet rikthyer atyre. Boll më me presidentë që po prishin imazhin e futbollir vetëm për të fituar me çdo mënyrë.
Mos u bëni vegël e disa drejtuesve që kanë mbi 10 vjet që hedhin baltë mbi FSHF-në dhe kujtdo që punon për të mirën e sportit. Ata duan të justifikojnë gabimet e tyre duke krijuar armiq kudo.
Partizani ka tani një zot, ka Gaz Demin që e mbron. Për mendimin tim ju po gaboni", përfundon për newsport.al ish drejtori i Partizanit./NEWSPORT.AL
Lexo gjithashtu
