Florent Hasani ishte me valixhe në duar teksa pritej që nga momenti në moment të largohej nga Tirana. Sulmuesi pati oferta të shumta, me destinacionin e tij që pritej të ishte Stambolli. Por, në ditët e fundit të merkatos duket se tratativat nuk shkuan siç duhet dhe mbetej e paqartë e ardhmja e tij.
Është vetë dardani i cili qartëson gjithçka teksa në prononcimin e dhënë për mediat para ndeshjes me Skënderbeun, konfirmoi qëndrimin e tij te bardheblutë.
“Jam i qetë sepse ka qenë kohë stresues për mua dhe tani do të jem 100% i përqendruar këtu. Ka pasur disa tratativa për mua, por nuk është realizuar dhe tani jam i përqendruar me ndeshjet dhe shohim në të ardhmen nëse ndodh diçka”, deklaroi Hasani.
Lajm fantastik për Tiranën, trajnerin Shehi dhe tifozët e klubit që do të vazhdojnë të kenë në skuadër golashënuesin më të mirë të sezonit të kaluar. Me lojtarë si Latifi, Abazaj, Kaina, Haxhiu e Patrick, sulmi i Tiranës është padyshim i mbipopulluar me lojtarë cilësor për të përballuar më së miri kampionatin.
Lexo gjithashtu
