Problemet financiare apo ato me kontratat në futbollin shqiptar tanimë dihen, ndërsa futbollistët e huaj që vijnë në vendin tonë shpeshherë akuzojnë drejtuesit e klubeve. Këtë herë, ish-mbrojtësi i Laçit në vitin 2019, Sebastian Toro ka akuzuar drejtuesit kurbinas nga Kili,
Amerikano-latini, për mediet vendase ka treguar se i është premtuar shumë nga drejtuesit e Laçit, ndërsa këto gjëra nuk ishin realizuar. Në deklaratën e tij ai i ka quajtur drejtuesit jo-profesionistë. Aktualisht 30 vjeçari luan në vendin e tij, në kategorinë e tretë me Colina AC.
“Erdha keq nga Shqipëria, pasi kisha edhe një vit kontratë. Pagesat nuk i përmbushën, pasi atje klubet nuk është se janë shumë profesionale, si këtu, apo në vendet e tjera. Kishim edhe probleme me gjuhën atje. Familja ime nuk ishte e lumtur dhe përveç kësaj kishte gjëra që ata m’i premtuan dhe nuk i realizuan. Kështu që, gjërat u mblodhën dhe mora vendim të kthehesha”, tha ndër të tjera Toro.
