LAÇI i fuqishëm brenda dhe jashtë fushe, kurbinasit mbushin arkën

Myrto Uzuni nuk do të jetë lojtar i Laçit. Sulmuesi anësor i kurbinasve do të nisë fazën e re të karrierës jashtë Shqipërisë në Kroaci me Lokomotivën e Zagrebit. Dy klubet kanë rënë dakord për transferimin e 23-vjeçarit ku kroatët kanë paguar plot 350 mijë €. Uzuni ka hedhur firmën për të qenë pjesë e skuadrës së re për 4 sezone. Operacioni për shitjen e tij është realizuar në ditën e fundit të merkatos së verës dhe kurbinasit do të përfitojnë nga ky operacion. Të dyja palët kanë rënë dakord që Laçi të mbajë 20% të kartonit të Uzunit dhe nga çdo transferim i tij ai do t’u sjellë fitime kurbinasve. Uzuni do të përfitojë plot 7 mijë € në muaj. Për këtë transferim të bujshëm aktor kryesor ka qenë ish-trajneri i Laçit Besnik Prenga, i cili kishte njohje të mira me Lokomotivën e Zagrebit. Uzuni la shenjën e fundit në barazimin 1-1 me Skënderbeun në Korçë duke i dhënë një pikë të vyer Laçit përpara se të largohet drejt Kroacisë.