Egnatia dhe Laçi kanë mbyllur në barazim sfidën e vlefshme për javën e 23-të të “Abissnet Superiore”. Ndeshja që u zhvillua në stadiumin “Arena Egnatia”, përfundoi me rezultatin 0-0. Në këtë sfidë u humb dhe një penallti nga Sebastian Spahiu. Goditjen e lojtarit të Egnatias, e ndali Mario Dajsinani me një super pritje. Pas kësaj sfide, për mikrofonat e MCN TV, foli trajneri i Laçit, Mirel Josa.
“Ndeshja kishte rastin e penalltisë që mund të shënonte Egnatia, dhe mund të merrte rrjedhë tjetër. Unë jam i kënaqur me mënyren se si lojtarët u vendosën në fushë dhe luftuan për të mbyllur hapësirat kur Egnatia kishte organizim në lojë. Por me thënë të drejtën, unë nuk jam i kënaqur me mënyrën e lojës sonë. Shkuam 3-4 herë te porta e Egnatias dhe mund të shënonim, por duhet të përpiqeshim më shumë për të mbajtur topin në mesfushë dhe të dilnim me pastër në zonën e Egnatias. Nuk u futëm për barazim, por kur ndodh me ekipin kryesues s’mund t’u thuash gjë lojtarëve. Lojtarët nuk nxitohen në zonën kundërshtare, problemi është si të shkojmë deri aty. Kishte raste që ne bënim shumë përpjekje për të organizuar mbrojtjen, por ne kemi patur raste sidomos në pjesën e parë. Kemi humbur topin shumë shpejt duke i dhënë të drejt Egnatias të na vendosë në presion”, u shpreh fillimisht Mirel Josa.
Laçi ishte futur sot për 3 pikët?
“Në çdo ndeshje unë nuk futem për të marrë 1 pikë. Por thashë që duhet të kemi parasysh pjesën e parë ku ne humbëm shumë topin. Bënim gjithë atë punë në pjesën mbrojtëse. Edhe nga presioni i kundërshtarit ne e humbëm topin disa herë.
Nuk është se ne futëm lojtarë krahu, u kushtëzuam nga dalja e Prodanit. Futëm lojtarë krahu duke patur parasysh kartonin e verdhë që mori Prodani. Prandaj i kam thënë lojtarëve para ndeshje, që lojtari që futet mund të luajë 20 ose 45 minuta, por duhet të futet me oreksin për të kryer detyrën e tij. Në 20 metrat e fundit problemi ishte zgjidhjet që ne bëmë, nuk ishin të drejta dhe nuk më pëlqyen. Me individët e veçantë mund të bisedoj nesër pasi sot është shumë shpejt.”
Me kë e ka garën Laçi për të qenë në “Final Four”?
“Të them të drejtën nuk është problemi kë do të kapë Laçi. Ne duhet të sigurojmë 3 pikët. Ne kemi ndeshjen e ardhshme dhe duhet të fitojmë me doemos që të jemi në rrugë të drejtë për t’i shkuar deri në fund objektivit që kemi. 10 minutat e fundit çdo trajner mundohet që të kapë çfarë të kapë. Ne kemi dy barazime në fushën tonë, mund të them që me Vllazninë mund të kishim humbur duke patur parasysh mënyrën si luajti Vllaznia. Por jam nga ato tipa që nuk hidhem shumë në aventurë. Problemi është që duhet të kemi zgjidhje për veten tonë që të jemi shumë më të lirshëm.”
Lexo gjithashtu
