Lulëzim Bashës, kryetarit të opozitës në Shqipëri, nuk ia ndjen fare për Kombëtaren tonë të futbollit dhe pjesëmarrjen e saj historike në një kompeticion të madh, siç është Euro 2016. Ose z.Basha nuk e pëlqen aspak futbollin, ose e konsideron si një arritje të qeverisë kualifikimin për në Francë 2016 dhe e injoron atmosferën e zakontë, që po përjetojnë të gjithë shqiptarët kudo ndodhen gjatë këtyre ditëve. Nuk kishte si të mos binte në sy ky indiferentizëm i kryetarit të Partisë Demokratike, që duket se e ka alergji të kuqen.
SALI BERISHA - Vërtet i çuditshëm qëndrimi i kryeopozitarit Basha, sepse edhe udhëheqësi i partisë së tij, z.Sali Berisha, ka bërë vazhdimisht postime në rrjetet sociale, që lidhen me ndeshjet e kombëtares në Francë dhe me qytetarinë që ka treguar tifozëria jonë, duke dhënë edhe ai mbështetje morale, sipas mënyrës së vet, për kuqezinjtë tanë. Të paktën për të imituar modelin e vet duhet të bërë diçka. Postimi i fundit i ish-kryeministrit Berisha mban datën e djeshme.
EDI RAMA - Më shumë aktiv akoma ka qenë gjatë gjithë këtyre ditëve Kryeministri i vendit, Edi Rama, i cili, pavarësisht angazhimeve të ndryshme politike, ka qenë gjithmonë në koherencë me atë çfarë po ndodh me Kombëtaren në Euro 2016. Madje, kreu i qeverisë u është drejtuar kuqezinjve shpesh me letra inkurajuese, duke i përgëzuar për paraqitjen e mirë që kanë bërë në dy ndeshjet e para. Postimi i fundit i Kryeministrit Edi Rama mban datën e sotme, pasi asnjëherë ai nuk mungon në “takimin” me kuqezinjtë.
SA PËR SY E FAQE - Në faqen zyrtare në “facebook” të z.Lulëzim Basha, duhet të gërmosh thellë për të gjetur postimin e fundit në lidhje me Kombëtaren. Janë dy postime sa për sy e faqe të datës 11 qershor, kur përfaqësuesja jonë luajti ndeshjen e parë në grup, atë me Zvicrën. Komente dhe postime fotosh sa për të thënë, sepse më 15 qershor, kur kuqezinjtë luajtën me Francë dhe pas asaj ndeshjeje nuk mbeti shqiptar pa komentuar, z.Basha nuk u ndje fare. Indiferentizëm absurd për një figurë kaq të rëndësishme publike, duke pasur parasysh impaktin që ka në këtë moment Kombëtarja. Pa dyshim, një argument që thjesht i ul pikë kryetarit të opozitës, sepse kuqezinjtë, me apo pa mbështetjen e tij, do ta bëjnë atë që kanë për të bërë.
TABAKU – Më aktive se kryetari i partisë së saj në mbështetje të kombëtares ka qenë deputetja Jorida Tabaku, e cila, pavarësisht lokalizmit, siç shkruan edhe vetë, e ka bërë të vetën për t’u dhënë kurajë kuqezinjve.
RISTANI – Kurse nënkryetari i PD-së, Arben Ristani, në një postim të datës 15 qershor, e lidh paraqitjen e mirë të Kombëtares në ndeshjen me Francën me mungesën e Kryeministrit Rama në stadium. Shfrytëzimi më i keq që mund t’i bëhet sportit për politikën.
Lexo gjithashtu
