Sulmi me thikë i ndodhur ditën e djeshme në qendrën stërvitore të Tiranës ndaj trajnerit bardheblu Migen Memelli, tronditi për herë të katërt brenda pak kohësh opinionin publik. Në krye të detyrës, duke trajnuar të ardhmen e 24-herë kampionëve të Shqipërisë, ish-sulmuesi i njohur i Superiores u godit dhe u kërcënua nga prindi i njërit prej futbollistëve.
Zakonisht përdoret shprehja se qëllimi justifikon mjetin, por këtë veprim të turpshëm nuk mund ta justifikojë asgjë. Jo më larg se para 6 javësh i njëjti rast ndodhi me trajnerin kampion Ernest Gjoka, i cili u kërcënua dhe u tentua të goditej pas seancës stërvitore të Vllaznisë.
Pak ditë më pas, tekniku i Vllaznisë B, Ervis Kraja u gjend para një situate të pazakontë teksa gomat e makinës së tij i gjeti të shpuara. Dhe si të mos mjaftonte kjo, shkodranët duhet të përballeshin edhe me kërcënimet me plumba në Dibër, ku Enes Isufi u kërcënua me jetë në fushën e blertë nga drejtori i klubit të Korabit, Fehmi Mziu duke i thënë: "Të fus plumbin". Në momentin që pritej një reflektim nga të gjithë "aktorët" e kampionatit shqiptar, prindër, lojtarë dhe trajnerë, ditën e djeshme vjen lajmi i rëndë nga kryeqyteti.
Një njeri që ka shërbyer për shumë vite në kampionatin shqiptar si me gola dhe së fundmi në trajnin, siç është Migen Memelli, kërcënohet sepse nuk futi një nga lojtarët në formacion. Vitet po kalojnë, po jo e njëjta gjë mund të thuhet për mentalitetin e futbollit tonë në vend.
Duelet në fushën e blertë, "amplifikohen" jashtë saj nga prindërit të cilët e duan domosdoshmërisht djalin e tyre në formacion. Matko Djarmati e tha bukur: "Futbollist nuk bëhesh mezor". Ndaj, do ishte e udhës që Superiorja dhe të gjitha kategoritë inferiore të ngjanin sadopak me Kombëtaren kuqezi, e cila në gjirin e saj ka "yje" që i kërkon gjithë Europa, ku padyshim nuk janë bërë futbollistë nga babai.
Jetojmë në vitin vitin 2018 ku numërojmë gjithë kënaqësi golat e Messit dhe Ronaldos në kampionatet europiane, ndërsa në vendin tonë? Duket të jemi kthyer pas në kohë, pikërisht në vitin e trazirave të mëdha, 97-tën e frikshme ku thikat dhe plumbat ishin në plan të parë... /Retin TOKA/
Lexo gjithashtu
