Vllaznia nuk shkoi më shumë se barazimi 2-2 me Kastriotin në “Elbasan Arena”. Kuqeblutë u ndëshkuan në minutat e fundit të sfidës duke humbur kështu terren në garën për një vend në Europë.
Por jo vetëm kaq, pasi në këtë sfidë kuqeblutë mbetën me 10 lojtarë, pasi Marko Juric mori kartonin e dytë të verdhë, duke dalë me të kuq nga ndeshja.
Kjo do të thotë se mbrojtësi nuk do të jetë nënurdhrat e Goce Sedlovskit për sfidën e radhës në kampionat ndaj Teutës. Një sfidë mjaft delikate, pasi tashmë durrsakët dhe shkodranët i ndan vetëm 1 pikë në tabelën e klasifikimit.
Timonieri maqedonas duhet të bëjë llogaritë pa kroatin dhe në këtë mënyrë “dhimbjet e kokës” për të kanë nisur të shtohen. Sedlovski duhet të “arnojë” mbrojtjen ndaj durrsakëve, teksa synimi i vetëm do të jenë vetëm 3 pikët, të cilat mungojnë prej 4 javësh.
Lexo gjithashtu
