Një prej atyre fytbollistë që e di shumë mirë se çfarë domethënë një derbi është, Igli Allmuça. Një lojtar që është rritur me këto sfida dhe që realizoi ëndrrën e tij të luajë në një takim të tillë, mund të flasë për ndeshjen mes Partizanit dhe Tiranës. Një titull me bardheblutë në vetëm një sezon dhe 7 vite tek Partizani nuk harrohen lehtë nga mesfushori kryeqytetas.
Në një intervistë të dhënë enkas për newsport.al, Igli Allmuça ka folur për ndjesitë e një derbi, për ekipet, madje dhe për atë që zemra i rreh më shumë. Kujtimet, ndeshja më spektakolare dhe pikat e forta e të dobëta të çdo ekipi kanë qenë fokusi i kësaj interviste me trajnerin aktual të Dinamos, të cilën iu ftojmë ta lexoni më poshtë.
- Çfarë kujtimesh iu sjell në mendje kur afrohet derbi, si një lojtar që e ka provuar një të tillë, qoftë me Partizanin apo me Tiranën?
Kanë qenë ndeshjet që kisha një fiksim më të madh, ndeshje të tilla ngelin gjatë në memorien e futbollistëve dhe janë sfida që përjetohen shumë, si nga tifozeritë e skuadrave, por edhe nga mediat e opinioni sportiv. Unë kam pasur një emocion specifik, është një ndjesi ndryshe.
- Cili ka qenë një nga ato derbi që ka mbetur thellë në memorien tuaj?
Sigurisht janë shumë derbi dhe sidomos ato që janë fituar. Megjithatë një nga ndeshjet që më ka mbetur më shumë në mendje është barazimi 3-3. Ka qenë një derbi spektakolar. Me thënë të drejtën çdo derbi ka pasur bukurinë e vet.
- Aktualisht të dyja ekipet janë në një gjendje të ndryshme, cilat mendoni se janë pikat e dobëta dhe të forta të të dyja e ekipeve?
Partizani duket një skuadër shumë më solide, ka dhe luksin e vendit të parë. Ndersa Tirana është disi më e brishtë dhe pëson më kollaj. Ndersa fizionomia e Partizanit është mbrojtëse, gjithmonë ka qenë një skuadër e vështirë për kundërshtarin.
Përsa i përket klasifikimit, ndeshjet derbi nuk ndikohen shumë. Unë mendoj që presioni është më shumë tek Partizani sesa tek Tirana. Bardheblutë janë mësuar tani me humbjet në derbi edhe futet si inferiore. Partizani do e ketë presionin e kreut sepse i duhet vazhdimësia e ndeshjeve dhe pikët.
- Çfarë kanë ndryshuar në ndeshjet derbi të asaj kohe me këto aktuale?
Unë them që në të gjithë komponentët, në çdo kohë të derbit, kanë qenë nga çdo këndvështrim të njëjta. Grinta, impenjimi i lojtarëve, mediat, opinioni sportiv, i kanë dhënë të njëtën rëndësi si ndeshje. Ajo që ndryshon është forma e lojtarëve, cilësitë e tyre dhe ekipet vet, se çfarë kanë në përbërje.
Ka pasur raste që Tirana ka qenë më e kompletuar, ashtu siç ka pasur momente që ka qenë Partizani. Ose të dyja skuadrat kanë qenë në të njëtin nivel loje. Në përgjithësi si atmosferë dhe "trumbetim" i mediave, derbit mendoj që janë të njëjta.
- Trajnerët e të dy skuadrave e dinë shumë mirë se çfarë do të thotë një derbi, si Gega ashtu dhe Mema. Ju, ku mendoni se duhet të godasin të dy teknikët kundërshtarin?
Të dy trajnerët kanë luajtur në skuadrat respektive dhe kanë qenë nga ata lojtarë që kanë qenë me shumë grintë. E dinë shumë mirë se si t'i injektojnë futbollistëve atë atmosferën e derbit sepse e kanë përjetuar vet.
Se ku mund të godasin ata, e dinë më mirë ata vetë sepse pak a shumë e kanë analizuar kundërshtarin. Se sa do të realizohen planet e tyre, varet nga aftësia e lojtarëve dhe a arrijnë ata të zbatojnë urdhrat e trajnerëve, për të goditur aty ku duhet. Puna e trajnerëve këtë javë është t'iu tregojnë lojtarëve se ku duhet të godasin dhe ku duhet të ruhen.
- Ju keni luajtur dhe tek Tirana dhe tek Partizani, cili ekip qëndron më "lart" në zemrën tuaj?
Është pak e koklavitur kjo punë, unë jam vet nga Tirana dhe në lagjen time ka vetëm tifozë të Tiranës. "Ali Demi" është plot me tifozë të ekipit të Tiranës, por unë kam kaluar 7 vite tek Partizani nga ekipi i të rinjve tek ekipi i parë. Ka qenë një skuadër ku unë aty jam bërë futbollist profesionist edhe sigurisht që më shumë nostalgji kam për këtë ekip.
Mua më ka ngel një peng që doja një titull me Partizanin, pasi kam marrë një me Tiranën dhe një me Dinamon, ndërsa me Partizanin nuk e realizova dot. /Marsel Alliaj/
Lexo gjithashtu
