Ditën e sotme u mbyllën dy takimet e mbetura të javës së 4-të të “Abissnet Superiore” dhe tashmë menjëherë vëmendja do të kthehet te ndeshjet pasardhëse.
Kështu java e 5-të do të luhet në dy ditë, 22 dhe 23 shtator. Të premten janë parashikuar të zhvillohen 2 takime. Në fakt në këtë ditë do të zbresin në fushë skuadrat kryeqytetase. Fillimisht në orën 15:00 në “Selman Stërnasi” do të luhet takimi mes Tiranës dhe Erzenit.
Bardheblutë duan një tjetër 3 pikësh për të “blinduar” vendin e parë në klasifikim, ndërsa shijakasit kërkojnë të vazhdojnë me serinë e fitoreve në kampionat. Ndërkohë 3 orë më vonë do të jetë radha e Partizanit dhe Dinamos për të “luftuar” mes tyre për pikët e kësaj jave.
E gjithë vëmendja do të jetë në “Elbasan Arena” duke nisur që nga ora 18:00, ku “Blutë” dhe Demat do të zhvillojnë mes tyre edhe derbin e parë të këtij sezoni. Ashtu si “nëndetësja” edhe të kuqtë do të hyjnë në fushë vetëm për fitoren, pasi kërkojnë të renditen mes ekipeve të kreut.
Ndërkohë të shtunën janë në program 3 sfida. Në orën 15:00 në “Egnatia Arena” do të luhet dueli mes Egnatias dhe Laçit. Ndërkohë në orën 18:00 do të sfidohen në Korçë, Skënderbeu dhe Kukësi. Takimi i fundit do të jetë mes Vllaznisë dhe Teutës që do të luhet në “Loro Boriçi” duke nisur që nga ora 20:15.
Lexo gjithashtu
