Ditën e djeshme u mbyll edhe java e 29-të e Abissnet Superiore, ku Tirana u “shkëput” në krye me 5 pikë më shumë se Partizani i vendi të dytë.
Menjëherë tashmë është zbuluar edhe agjenda e javës së 30-të të kampionatit. Duele mjaft interesante dhe direkte do të luhet për mbijetesën, teksa gjithçka do të kulmojë me Klasiken e Shqipërisë dhe derbin e Durrësit.
Skuadrat do të zbresin në fushën e lojës në fundjavë, përkatësisht 21 dhe 22 prill. Ditën e shtunë do të luhen 3 takime. Gjithçka do të nisë me sfidën mes Egnatias dhe Laçit që do të luhet në orën 15:00. Mbetet për tu përcaktuar stadiumi ku do të zhvillohet ky takim, pasi rrogozhinasit janë të dënuar t'i luajnë ndeshjet si pritës në fushë asnjanëse. Ndërkohë në orën 18:00 do të zhvillohen njëkohësisht dy sfida. Teuta-Erzeni përplasin “brirët” në “Niko Dovana”, ndërsa në “Loro Boriçi” do të luhet Klasikja e Shqipërisë mes Vllaznisë dhe Tiranës.
Ndërkohë e diela ka rezervuar dy përballje. Në orën 15:00 do të luhet Kastrioti-Kukësi, duel direkt për mbijetesën mes dy ekipeve që do të luhet në "Elbasan Arena". Gjithçka do të mbyllet me sfidën mes Partizanit dhe Bylisit që do të startojë në orën 18:00 në stadiumin “Partizani”.
SFIDAT dhe ORARET:
E Shtunë:
15:00/ Egnatia-Laçi ( I pacaktuar)
18:00/ Teuta-Erzeni (Niko Dovana)
18:00/ Vllaznia-Tirana (Loro Boriçi)
E Diel:
15:00/ Kastrioti-Kukësi (Elbasan Arena)
18:00/ Partizani-Bylisi (Partizani)
Lexo gjithashtu
