Kampionati Botëror i "fiksoi" të gjithë tifozët e futbollit me spektaklin dhe emocionet e dhuruara në 64 ndeshje në Rusi. Që nga sfida hapëse dhe deri te ajo e fundit, kemi parë gola nga më të ndryshmit, me futbollistë të "mëdhenj", apo edhe ata të cilët kanë arritur të bëjnë një kampionat pozitiv.
Megjithatë, Botëruri nuk u luajt vetëm në Rusi, por edhë në studiot televizive, ku ishin të ftuar shumë personazhe, jo vetëm nga "bota" e futbollit.
Kjo gjë duket se nuk i ka pëlqyer aspak ish-futbollistit të Superligës, Justin Bespalla, i cili "mllefin" e tij e shpreh nëpërmjet rrjeteve sociale.
"Shyqyr që mbaroi kampionati Botëror se na dolën të gjithë specialista futbolli. Nuk kishte studio televizive pa modele, pa aktorë, pa këngëtarë dhe këngëtare. Pa politikanë dhe shumë shumë pak të ftuar futbollista që e kanë patur të gjithë jetën e tyre të lidhur me futbollin. Na e nxorrën lojën më të bukur në botë, futbollin, nga qefi.
Jam i mendimit që të gjithë futbollistët që kanë luajtur dhe luajnë futboll të marrim pjesë në parlament, të marrim pjesë në juri këngësh, të marrim pjesë në filma. Të bëjnë këngë dhe të jenë prezent në përzgjedhjen e modeleve. Në asnjë nga këto që përmenda më lart nuk kam parë që të japin mendim ose të jenë të ftuar futbollistë, prandaj i bëj thirrje të gjithë studiove sportive, të gjithë gazetarëve të jenë më realistë, se në këtë më mënyrë rrisin prestigjin e tyre, duke ftuar futbollista të vjetër nga çdo cep i Shqipërisë, se kanë jetuar një jetë të tërë me futbollin dhe se futbolli është jeta e tyre. Jepini komentet dhe mendimet për futbollin atyre që kanë lënë jetën pas futbollit, sepse do zbukuronit edhe studiot e juaja dhe do rrisnit potencialin si gazetarë, duke thirrur futbollistët e vjetër nga çdo qytet dhe jo t'i bini shkurt.
Mos u bëni servila të askujt, por mbani lart reputacionin tuaj si gazetarë dhe si studio televizive, duke thirrur ata që i takojnë të jenë aty, futbollistët".
Lexo gjithashtu
