Ndeshja me e madhe në historinë e futbollit shqiptar do të luhet ditën e premte duke nisur që nga ora 19:00. Në “Air Albania” është rezervuar të zhvillohet një nga sfidat më të luftuar mes dy skuadrave të kryeqytetit. Ashtu siç jemi mësuar tashmë në vitet e fundit rivaliteti mes Tiranës dhe Partizanit ka dhuruar spektakël në fushën e lojës dhe jashtë saj.
Të gjithë tifozët vëmendjen e këto ditë e kanë pikërisht te derbi i kryeqytetit, sfidë që vlen më shumë se 3 pikë, vlen për krenarinë e një qyteti. Derbi rikthen emocionet edhe e ish-portagonistëve të tij, të cilët kanë luaftuar kundër rivalit të përjetshëm për të siguruar 3 pikët.
Altin Beqiri është njëri prej tyre, i cili ka patur fatin të veshë fanelat e Partizanit dhe Tiranës, ndërsa në fushë ka djersitur për të dyja ekipet. Ish-mbrojtësi i njohur i Superiores flet para derbit në një intervistë për “Newsport.al”, ndërsa tregon dhe për cilën skuadër do të bëjë tifo në sfidën e së premtes.
- Eksperienca juaj e fundit si lojtar dhe trajner është te Kamza, pse Beqiri ka “hequr” dorë nga Superiorja dhe a iu mungon kampionati shqiptar? Jo nuk më mungon (Qesh). Kush tha që kam hequr dorë? Unë aktualisht jam i angazhuar në Superiore dhe po vazhdoj të jap kontributin tim në kampionatin shqiptar.
- Skuadrat shqiptare kanë një “sëmundje” për të ndërruar trajnerët në rast se dështojnë në rezultate. A jeni gati të drejtoni në Superiore? Puna e trajnerit është shumë e vështirë. Nëse skuadra merr rezultate të mira duartrokiten të gjithë dhe nëse ndodh e kundërta të gjitha kritikat dhe përgjegjësitë bien mbi trajnerin. Edhe në këtë sezon ka pasur ndërrim të trajnerëve, ndërsa unë aktualisht jam asistent i Skerdi Bejzades që mori drejtimin e Erzenit dhe momentalisht nuk do të doja të isha trajner i parë.
- Të premten luhet derbi mes Partizanit dhe Tiranës. Çfarë ju vjen menjëherë në mendje? Derbet gjithmonë kanë qenë dhe do të vazhdojnë të jenë të luftuar. Është një ndeshje derbi që i ka të gjitha, që nga lufta, spektakëli, emocionet, show dhe nervozizëm. Nga derbit sigurisht të ngelin në mendje debatet dhe ngacmimet e tifozëve që bëhen kudo nëpër ambiente të ndryshme.
- Keni luajtur si me Tiranën ashtu edhe me Partizanin, me cilin prej ekipeve ke kujtimet më të bukura? Kam patur fatin të luaj derbe të rëndësishme dhe emocionet nuk janë asnjëherë njëlloj. Çdo derbi që luan ka një ndjesi të veçantë në vetvete… përtej çdo rezultati që prodhon fusha.
- I keni përjetuar emocionet e derbit me të dyja fanelat, cilin prej tyre do të veçonit si më të paharrueshëm në karrierën tuaj? Pse? Siç e thash edhe pak më lart, derbet janë të paparashikueshëm dhe emocionet që përjeton si para, gjatë dhe pas sfidës janë të paharrueshme. Do të veçoja ato me Partizanin, pasi e kam kaluar si një lojtar i kuq thuajse të gjithë karrierën time futbollistike.
- Në mbrojtje keni qenë luftarak dhe i pakalueshëm, kush nga lojtarët e dy ekipeve i përshtatet më shumë stilit të lojës tuaj? (Qesh) Nuk mund ta gjej dot. As gishtat e dorës nuk janë njëlloj dhe si të tillë nuk mund të gjesh as lojtarin që i përafrohet lojës time.
- Këtë sezon të dyja ekipet kanë probleme, sipas jush çfarë “çalon”? Të them të drejtën nuk e di, por kam përshtypjen se te Partizani më shumë ia kanë krijuar vetë vetes problemet. Do iu duhet pak kohë sa të rigjejnë vetën dhe të kthehen te rezultatet pozitive.
- Partizani apo Tirana, kush e fiton derbin e 3-të të sezonit? Asnjë nuk mund ta gjejë se kush fiton. Normalisht se çdo tifoz i njërës skuadër apo tjetrës thotë për ekipin e tij. Kështu që unë nuk mund të them se kush fiton, është pak e vështirë, por do të doja Partizani.
- Për kë do të bëjë tifo Beqiri dhe a do të jeni në stadium? Sigurisht që vetëm për partizanin, është skuadra ku unë kam kaluar thuajse gjithë karrierën time futbollistike dhe ku kam përjetuar emocione të papërshkrueshme. Sa për prezencën time në stadium do të doja shumë të isha, por ende nuk jam i sigurtë nëse do të mund të jem". / Floridona ADEMAJ/
Lexo gjithashtu
