Teuta arriti një fitore mes polemikash në javën e fundit kundër Luftëtarit me rezultatin 3-2. Fitore që i ktheu durrsakët në rrugën e duhur. Për ndeshjen në Gjirokastër dhe situatën në ekip ka folur portieri i Teutës për newsport.al Elhan Kastrati. "Gardiani" nuk e mendon se ekipi i tij u favorizua nga arbitrat por i gëzohet fitores së merituar dhe gjithashtu vë në "shënjestër" Vllazninë për ndeshjen e kësaj fundjave.
- Kastrati arritët një fitore mes polemikash kundër Luftëtarit. Cili është komenti juaj ?
Nuk e kuptoj pse u bë aq e madhe ajo situatë. Një ndeshje futbolli të shndërrohet në diçka të tillë, nuk arrita ta kuptoja. Kishte disa vendime të arbitrit ndoshta ta pasakta por ata ishin për të dy ekipet. Nuk mendoj se loja apo ekipi i Teutës u ndihmuan apo ndikuan nga arbitri.
- Ju thoni që arbitri nuk iu "dha një dorë" ?
Absolutisht që jo. Nuk jemi ndjerë aspak të favorizuar nga arbitri. Ishte një fitore totalisht e merituar. Ne flasim në fushën e lojës dhe jo pasi ka mbaruar ndeshja. Nuk e pamë veten në asnjë çast të favorizuar nga arbitri dhe mendoj se kështu si them unë thonë edhe shumica e atyre që kanë parë ndeshjen.
- Kjo fitore iu kthen në rrugën e duhur në kampionat me sa duket.
Po, është e vërtetë që rikthehemi në rrugën e duhur. Pas 2 muajve të vështirë që kaluam tani duam të vazhdojmë në rrugën pozitive. Duhet të përgatitemi për ndeshjet e rradhës pasi ndryshe ky 3 pikësh në Gjirokastër nuk merr vlera nëqoftëse nuk shfaqim të njëjtën dëshirë edhe në ndeshjet e tjera.
- Pra, ju po vendosni në objektiv Vllazninë duke qenë se është ndeshja e rradhës ?
Vllaznia është kundërshtari i rradhës dhe ndaj tyre duhet që sërish të tentojmë 3 pikët. Nuk do jetë një ndeshje e lehtë por duke luajtur në fushën tonë duhet të shfrytëzojmë çdo gjë në maksimum. Duhet që të japim më të mirën në çdo ndeshje dhe me çdo kundërshtarë.
- Cili është objektivi që mund ti vendosni kësaj Teute, duke parë luhajtjet që ka pasur ?
Për objektiva mendoj se është herët të flasim. Ende nuk ka mbaruar gjysma e kampionatit dhe prandaj nuk mund të përcaktoj një objektiv. Objektivi ynë janë ndeshjet e rradhës të cilat duhet ti marrim me rradhë dhe të tregojmë vlerat tona.
- Luajtët titullar në Gjirokastër, mendoni se do jeni në vazhdim pjesë e 11- shes titullare ?
Nuk ka rëndësi kush luan apo jo. Rëndësi ka që ekipi të fitojë e të ecë në rrugën e duhur. Nuk i marr unë këto vendime nëse do luaj apo jo. Janë vendime që i përkasin trajnerit dhe unë i respektoj ato. /Endri Çinari/
Lexo gjithashtu
