Është i ri në skenën e Fitnessit, megjithatë ka lënë mbresa me fizikun e tij. Ai është Klaton Kumaraku, kampioni i "Fitness Physique", i shpallur në vitin 2014. Jeton në Shqipëri dhe në një prononcim për newsport.al ka folur për sukseset e tij, gjithashtu ka treguar mënyrën se si mund t'ia dalim që të kemi një fizik sa më të bukur. Klatoni punon prej disa kohësh si instruktor palestre, dhe për këtë na ka sygjeruar disa rregulla që duhet të ndjekim kur ushtrohemi në palestër.
- Keni fituar çmim vitin e kaluar në fitness. Do ta shohim përsëri Klatonin në skenë?
Çmimi i parë për Fitness physique është marrë në vitin 2014. Vitin e kaluar kam përfaqësuar veten time në kampionat në mënyrë rigoroze. Këtë vit një demtim muskular më la pak mbrapa krahasuar me nivelin ku doja të arrija. Por do të rikthehem shumë shpejt. Pjesëmarrja si konkurent këtë vit nuk është e sigurt, por padiskutim do përfaqësohem si trajneri i Oltes, njërës prej klienteve te mia. Gjatë këtij viti iu dedikova punës si instruktor personal duke krijuar atë që ndoshta mund ta keni dëgjuar si KF team.
- Punoni prej disa kohësh si instruktor. Cilat janë vështirësitë që hasni?
Vështirësia kryesore është t'i mësosh njerëzit që procesi i të "formuarit të një trupi të mirë" është një proçes i avashtë, që do shumë dedikim, por që ia vlen maksimalisht. Krijon personalitet më të fortë duke u dukur më mirë, duke qenë më i fortë e më i shëndetshëm.
- Palestra është përhapur shumë si aktivitet. Çfarë rastesh ndeshni më shumë, për t'u dobësuar apo për shtim mase?
Më së shumti njerëzit kërkojnë të dobësohen, pas një jete sedentare në zyrë apo shkollë dhe një regjimi të keq ushqimor, të tonifikohen duke kundërshtuar proçesin e plakjes dhe të sedentarizmit dhe mjaft raste që kërkojnë një shëndet më të mirë seç kanë dhe punojnë për të vendosur masë muskulare. Rrugët janë të ndryshme, por qëllimi final i të gjithëve është përmirësimi i vetes në fizik dhe shëndet.
- Çfarë programi iu sygjeron klientëve tuaj?
Programet me të cilat punojmë janë të ndryshme, por gjithmonë alterohen ushtrimet e forcës, të rezistencës me ato aerobike, cardio. Jo vetëm të rrisim muskujt, por edhe të forcojmë sistemin kardiak.
- Ndonjë dietë specifike që duhet ndjekur, mund të na thoni?
Preferoj ta quaj regjim ushqimor ndjekjen e një ushqyerjeje të rregullt, prej se cilës të përfitosh sa më shume vlera të mundesh. Çelësi qëndron në balancën e ingredienteve që duhen. Nevojitet një ekuilibër i mirë mes karbohidrateve, proteinave dhe yndyrnave, ku proteinat zënë pjesën më të madhe, prej karbohidrateve preferohen ato komplekse, pra fibrat dhe nga yndyrnat, ato të pangopura.
- Është shumë e veshtirë të mbash edhe masën, por edhe të definohesh. Si mund t'ia dalin gjithë ata që e dëshirojnë?
Duhet alteruar stërvitja me pesha, me cardion. Më e mira është që cardio të ekzekutohet pas stërvitjes, pra pas 1 orë e gjysmë stërvitje rezistence, ti bën 30 minuta cardio duke djegur çdo rezervë glikogjeni të mbetur e duke nisur djegien dhjamore. Përveç cardios, ushtrimet ekzekutohen në super sete me kohë pushimi jo te gjatë, duke e bërë djegien e dhjamit pjesë shoqëruese të rritjes muskulare. Pjesa e rikuperimit është thelbësore, një gjum i mirë dhe një ushqyerje e duhur do i realizojë të dyja këto qëllime.
- Suplementet esenciale që duhet të përdorin gjithë ushtruesit e palestrës?
Suplementet jane te shumëllojshme dhe jo të gjithë i blejnë qoftë për shkak të kostos apo për shkak të pasigurisë nga mungesa e informacionit. Gjithsesi te klientët e mi sugjeroj përdorimin e proteinave dhe aminoacideve BCCA për të rikuperuar pjesën proteinike që nuk e arrijmë dot me ushqyerje. Ne afrimin e sezonit veror të gjithë nisin të përdorin fat burner (djegës dhjami) ose aminoacide që nxisin lipolizën për të përshpejtuar proçesin e definimit. Për performance dhe rezultat më të shpejtë merren multivitaminat dhe kreatina.
- Idhulli i Klatonit në Shqipëri dhe jashtë saj?
Në Shqipëri s'kam asnjë, ndërsa jashtë janë të shumtë. Më pelqen profesionalizmi dhe dedikimi që i kushtojnë këtij profesioni. Ndjek CT Flecher, Sadik Hadzovic, Dikerson Ross si dhe Jerdani Kraja, një kampion shqiptar që jeton në Amerikë.
- Një këshillë për instruktorët e palestrave?
Thjesht që të tregohen profesionalë në punën e tyre, të jene sa më të komunikueshëm me klientët dhe të dhurojnë sa më shumë dashuri te ta.
Lexo gjithashtu
