Feronikeli në Superligën kosovare të futbollit nuk po ecën në ritme të mira këtë sezon ku për momentin ndodhet në vendin e katërt të renditjes. Ekipi kosovar ka edhe ish-protagonistë të Partizanit si trajnerin Sulejman Starova dhe Behar Maliqin. Pikërisht mesfushori në një intervistë për Newsport.al flet për ekipin, ardhjen e Staroves në krye të skuadrës si edhe për një rikthim të mundshëm te 15 herë kampionët e Shqipërisë.
– Behar, jeni kapiteni i Feronikelit. Ky sezon nuk ka qenë ai që të gjithë prisnin për ekipin tuaj. A mund të na tregoni se çfarë ka ndodhur ?
Realisht kemi pasur një ekip me shumë lojtarë cilësorë, por ato që na kanë munguar kanë qenë rezultatet. Besoj se kanë qenë shumë faktorë. Gjatë vitit ka pasur shumë ndryshime dhe mendoj se këto kanë ndikuar.
– Si është atmosfera në skuadër pas ardhjes së Staroves ?
Atmosfera është shumë pozitive. Gjithë çunat janë të bashkuar dhe ekipi i ngjan një familjeje të madhe. Starova është një trajner me emër në futbollin shqiptar dhe besoj se është një luks që e kemi në ekipin tonë.
– Sa ndryshon ai nga Munishi ?
Secili trajner ndryshon nga tjetri. Secili ka stilin dhe taktikën e tij.
– Cili është objektivi final i Feronikelit ? 10 pikë pas vendit të parë janë shumë.
Do të mundohemi të fitojmë në këto ndeshje që kanë mbetur. Do mundohemi që të kemi një vend sa më lartë në tabelën e klasifikimit.
– Staroven e keni pasur edhe kur keni qenë te Partizani. A është njësoj si amë parë ?
Për fat të keq kur erdhi Starova te Partizani, unë u largova. Është hera e parë që punoj me të.
– Te Partizani e shkarkuan se dështoi. Si e komenton largimin e tij ?
Nuk është mund ta komentoj unë një çështje të tillë.
– Në Kosovë tashmë po vijnë jo vetëm lojtarë, por edhe trajnerë. Si e komentoni këtë ? Po rritet cilësia në Kosovë dhe Shqipëri duhet të jenë një ?
Po është normale tani që të afrohen trajnerë dhe lojtarë nga Shqipëria. Për futbollin kosovar është pozitive pasi vjen një eksperiencë më e madhe. Tek e fundit jemi të gjithë vëllezër. Gjithë trajnerët dhe lojtarët që vijnë nga Shqipëria janë duke luajtur në vendin e tyre këtu në Kosovë.
– Pas largimit nga Partizani, e keni ndjekur ekipin e kuq ?
Po gjithmonë sa herë jam i lirë e shoh Partizanin. Jam tifoz i Partizanit dhe kam dëshirë të shpallen kampionë vetëm të shpërblejnë ata tifozë të mrekullueshëm si Ultras Guerrils.
– Cili prej lojtarëve të Partizanit iu ka tërhequr më tepër vëmendjen ?
Ibrahmi mund të them, por edhe Alban Hoxha kanë treguar një nivel të lartë këtë sezon.
– A e mendon ndonjë rikthim te Partizani ?
Të them të drejtën më kanë telefonuar, por unë kam pasur kontratë me Ferronikelin dhe kam qenë shumë i kënaqur me ekipin ku jam dhe nuk kam dashur të largohem. Pas largimit nga Partizani jam prej 4 vitesh pjesë e Ferronikelit.
– Mendon ta mbyllësh karrierën te Feronikeli ?
Për momentin mendoj për këto ndeshje që kanë ngelur dhe më pas do shohim për të ardhmen. Jam 31 vjeç, kam ende kohë për tu menduar për përfundimin e karrierës.
– Surprizë këtë sezon ka qenë dhe Liria e Bledi Shkëmbit. Si e vlersoni punën e trajnerit korçar?
Bledi ka qenë një super lojtar, edhe si trajner po bën të njejtën gjë. Ka qenë surpriza e Superligës në këtë sezon.
-Ndalemi pak te Kombëtarja, duket se ka një përçarje mes FFK-së dhe FSHF-së. Përse mendon se ndodh kjo?
Se mendoj se ka përçarje. Më shumë e bëjnë portalet këtë përçarjen me dezinformim. Besoj se kanë marrëdhënie të shkëlqyer me njëra-tjetrën, pasi jemi një.
-Keni ndonjë mesazh të fundit?
Po, për tifozët ultrat “Tigrat e Zi”, ndërsa njerëzit janë shumë të kulturuar dhe që e njohin futbollin. Çdo skuadër që luan në Drenas është si në shtëpinë e vetë. Për këtë i falenderoj tifozët./ RETIN TOKA
Loading ...
Leave a Reply
You must be logged in to post a comment.