Lushnja këtë sezon do të luajë në Kategorinë e Parë, kjo pas ecurisë aspak të mirë në Superligë vitin e shkuar. Lidhur me këtë detaj, por edhe për të ardhmen e tij, në një intervistë ekskluzive për Newsport.al, Mikel Canka ka zbuluar shumë detaje interesante.
Së fundmi, sulmuesi ka firmosur një kontratë të re me Egnatian, skuadër me të cilën ai ka nisur një eksperiencë të re, klub ku shpreson të bëjë një punë të mirë, kjo pasi njihen mirë cilësitë e lushnjarit.
Canka nuk ka lënë pa përmendur ecurinë e Lushnjes vitin e shkuar në Superligë, ku kërkon edhe një herë ndjesë për tifozët lagunarë, për të cilët 31-vjeçari specifikon se kanë mbetur të zhgënjyër nga rezultati.
– Nga Lushnja te Egnatia, mund të na zbuloni pse kjo zgjedhje?
Zgjodha këtë skuadër, pasi më pëlqu projekti që më prezantuan drejtuesit e klubit të Egnatias.
– Largimi nga Lushnja, ishte vendim që u mor nga klubi apo ishit ju që besuat se ishte më mirë të ndyshonit skuadër?
Largimi nga Lushnja?! S’me ka larguar askush nga Lushnja, thjesht nuk më ka kontaktuar njeri për të më bërë të ditur objektivat që do të kishte klubi për sezonin e ri. Në këto kushte, unë zgjodha të shkoja te Egnatia.
– Eksperienca me Lushnjen në Superligë, si e kujtoni?
Eksperienca në Superligë ka qenë një vit shumë pozitiv nga ana sportive. Sa i përket rezultateve dhe renditjes, ka qenë një dështim për të gjithë ne si sportistë.
– Skuadra juaj e re bën pjesën në Grupin B në Kategorinë e Parë, ku duhet thënë se konkurenca është e madhe, mendoni se do ia dilni në fund të sezonit?
Grupi B ka shumë skuadra me emër në futbollin shqiptar dhe mendoj se është një grup miaft i fortë. Ne si ekip do bejmë maksimumin tonë për këtë sezon. Duhet të them që është shpejt për të folur për objektivat. Por, ne kemi një skuadër me përbërje të mirë lojtarësh që e njohin shumë mirë këtë kategori. Shpresojmë të japim më të mirën në fushën e lojës.
– Duhet pranuar që karrierës suaj futbollistike po i vjen fundi, nëse mund ta themi kështu pasi jeni 31 vjeç, kush dëshiron të jetë skuadra e fundit me të cilën do të luash para se tërhiqesh nga futbolli?
Është shpejt për të folur rreth fundit të karrierës time. Kam akoma për të dhënë. Në fushën e lojës ndihem shumë mirë fizikisht dhe dua të mbaj këtë ritëm. Dihet se çdo lojtar ka dëshirën e tij, ta mbylli karrierën aty ku u lind si lojtar. Unë sigurisht që e mendoj këtë gjë. Ishte Lushnja që më bëri lojtar.
– Merkatoja dhe përgatitjet, mendoni se drejtuesit e klubit të Egnatias kanë bërë lëvizjet e duhura për të plotësuar objektivat për sezonin e ri?
Duket qartë që drejtuesit kanë punuar shumë mirë me afrimet që kanë bërë në këtë merkato. Boshti i disa lojtarëve që mbyllën me sukses edicionin e shkuar janë në skuadrën tonë. Ata kanë bërë disa ndryshime. E thashë dhe më lart, drejtuesit kanë afruar disa lojtarë cilësor që e njohin mirë këtë kategori dhe kanë shfaqur cilësi mjaft pozitive për objektivat që ka klubi. Deri më tani ne po punojmë për të bërë diçka më të mirë. Pastaj është pak si shpejt për të folur rreth objektivave kyesore, ku çdo ekip ka dëshirën për tu ngjitur në Superiore. Ne do i marrim gjërat shtruar dhe me kujdes.
– A keni një mesazh për tifozët lushnjarë, duke ditur që kanë qënë në krahun tuaj vitin e shkuar edhe pse rezultati mungoi në shumicën e takimeve?
Mesazhi për tifozët? E kam thënë që në mbyllje të edicionit të shkuar. I kemi zhgënjyer shumë në Superiore. Por, një gjë është e qartë, ata se lënë kurrë ekipin vetëm. Si me Cankën në ekip, si pa Cankën, ata janë mbështetës mjaft pozitiv. Janë të dashuruar mbas ngjyrave verdhjeshile. Për këtë janë për tu falenderuar. Respekte për tifozët e qytetit tim. Iu uroj një sezon të mirë dhe plot bukuri nëpër stadjume, ashtu siç iu ka hije. /NEWSPORT.AL/
Loading ...
