Për shumë kënd dhe sidomos për tifozët e Partizanit, emri Marius Ngjela ka mbetur thellë në memorie. Sot në moshën 34 vjeçare sulmuesi i njohur ende është aktiv në futbollin e luajtur.
Për Newsport.al ai flet për aventurën e re në futbollin shqiptar, kampionatin e Superligës dhe sidomos për ish-ekipin e tij të Partizanit.
- Si fillim, ku luan sot Ngjela për ata që nuk e dinë ?
Unë aktualisht jam pjesë e futbollit me ekipin e KS Devollit të qytetit të Bilishtit. Një ekip që më ka dhuruar emocione të reja.
- Ç'mund të na thuash më tepër për ekipin e Devollit ?
Ekipi i Devollit është ekipi për tu mundur në këtë kategori. Një ekip simpatik i ndërtuar nga lojtarë vendas dhe korçarë. Po ashtu nuk mund të rri pa përmendur as trajnerin Devis Mema. Një trajner me ide të reja dhe shumëkërkues.
[caption id="attachment_189526" align="alignleft" width="300"]
Ngjela kur luante me Partizanin[/caption]
- Do arrijë ky ekip të plotësojë objektivat e vendosur ?
Për momentin jemi në vendin e 5-të dhe vetëm 6 pikë larg vendit të parë. Objektivi janë 2 vendet e para. Në fazën e dytë i presim ekipet pretendente në fushën tonë dhe besoj se do ia arrijmë qëllimit me mbështetjen e presidencës, me në krye kryetarin e bashkisë, Bledojn Nallbati.
- Për t'u kthyer pak te Superliga. Si e shikon kampionatin e këtij viti ?
Mendoj se këtë vit kampionatit i ka dalë i zoti shumë shpejt dhe ai është Skënderbeu. Të tjerët duhet të luftojnë për vendin e dytë pasi i pari dihet tashmë.
- Partizani ku keni kaluar ndoshta periudhën më të mirë të karrierë suaj po vuan. Pse mendoni kjo situatë te të kuqtë ?
Ndoshta vuajtja e Partizanit në këto vite është një super ekip si Skënderbeu që nuk po e konkurron dot. Më shumë te Partizani po vuajnë tifozët. Ekipi kthehet atje ku i takon nëse bëhet një mirëmenaxhim nga stafi dhe lojtarët të kuptojnë se çfarë fanelle të rëndë mbajnë veshur.
- Skënderbeu një ekip europian. Si mund ta arrijnë skuadrat e tjera nivelin e korçarëve?
Skënderbeu është një ekip europian dhe kjo është një meritë e madhe e presidentit Takaj. Kjo falë një menaxhimi të shkëlqyer dhe afrimin e lojtarëve të duhur. Mënyra më e mirë që ekipet e tjera të arrijnë nivelin e Skënderbeut është të pyesin Takajn.
- Tani ndoshta në periudhën e fundit të karrierës, po mendon Ngjela për jetën jashtë futbollit ?
Çdo fillim e ka edhe një fund, por unë ndihem mirë. Ndoshta ky është viti i fundit dhe dua ta mbyll në mënyrën më të mirë duke ngjitur Devollin në Kategorinë e Parë. Pasi të tërhiqem do merrem me trajnimin pasi kjo është gjëja që di të bëj më mirë. /Endri ÇINARI/
Lexo gjithashtu
